Buqaralyq aqparat quraldary qyzmetkerleri kúni qarsańynda qala basshysy Darhan Satybaldy jýrnalıserdi kásibı merekelerimen quttyqtady, sondaı-aq Almaty TV telearnasynyń qyzmetimen tanysty.
Almaty ákimine qoldanystaǵy jáne jańa medıa jobalar usynyldy, óndiris prosesi, sondaı-aq sıfrlyq platformalardy damytý jospary baıandaldy. Zamanaýı habar taratý formattaryn engizýge jáne aýdıtorıany keńeıtýge erekshe nazar aýdaryldy.
Kezdesý barysynda Darhan Satybaldy tilshilermen, redaktorlarmen, operatorlarmen jáne tehnıkalyq mamandarmen jyly shyraıly áńgimelesip, buqaralyq aqparat quraldary jumysynyń qala ómirindegi mańyzdylyǵyn atap ótti, qyzmetkerlerge mamandyqqa adaldyǵy úshin alǵys aıtty.
«Buqaralyq aqparat quraldary qyzmetkerleriniń kásibı merekesi qarsańynda sizdermen júzdesip, eńbekterińiz úshin alǵys aıtyp, kásibı merekelerińizben quttyqtaǵym keldi. «Almaty TV» tek Almatynyń emes, búkil respýblıka kólemindegi jetekshi teleradıokompanıaǵa aınalýy qajet. Búgingi kezdesý túıtkildi máselelerdi ortaǵa salyp, oı bólisip, sizderdiń usynys-pikirlerińizdi tyńdaýǵa taptyrmas múmkindik», – dedi Darhan Satybaldy.
Ol Almaty TV Almatynyń ǵana emes, respýblıkalyq deńgeıdegi jetekshi teleradıokompanıa bolýy tıis ekenin atady.
Onyń aıtýynsha, qazirgi zamanda BAQ ashyq ári aqparattyq qoǵam qurýda sheshýshi ról atqaryp otyr.
«Sizderdiń eńbekterińiz memleket pen halyq arasyndaǵy senimdi nyǵaıtýǵa yqpal etedi. Sizderge shynaıylyq, shabyt jáne jańa kásibı belesterdi baǵyndyrýdy tileımin», – dedi qala ákimi.
Aıta keteıik, Almaty TV 1999 jyly qurylǵan jáne elimizdegi eń kóne telearnalardyń biri. Sońǵy 3 jylda Almaty TV respýblıkalyq mártebege ıe boldy, rebrendıng ótkizdi, bas stýdıa pavılonyn jańartty jáne habar taratýdyń barlyq tujyrymdamasyn túbegeıli ózgertti.
Sonyń nátıjesinde telearna reıtıńi 2 ese ósti, jańartylǵan saıttyń qaralymy 5 esege artty. Medıaseller jelisi boıynsha komersıalyq kiris 3 ese ulǵaıdy. Telearnanyń memlekettik tilde shyǵarylǵan óz óndirisiniń úlesi 88%-ǵa jetti.