Ýnıversıtet basshylyǵynyń qatysýymen ashyq sabaqtar jalǵasa bermek.
Almaty qalasy Medeý aýdanyndaǵy №19 orta mektepte Abaı atyndaǵy QazUPÝ-dyń matematıka, fızıka jáne ınformatıka ınstıtýtynyń 4-shi kýrs stýdenti Ásem Saǵymbek matematıka páninen ashyq sabaq ótti, dep habarlaıdy Almaty-akshamy.kz
Ashyq sabaqqa Abaı atyndaǵy QazUPÝ rektory Darhan Bilálov, Medeý aýdandyq bilim berý bóliminiń basshysy Aǵaısha Saparova, №19 jalpy bilim beretin mekteptiń dırektory Aıymgúl Imanǵalıeva, dırektordyń oqý isi jónindegi orynbasary Shyńǵys Ábdimanap, sondaı-aq pedagogıkalyq praktıka jetekshisi Larısa Jadyraeva qatysty.
Rektor Darhan Bilálov bolashaq pedagogpen keri baılanys barysynda praktıkanttyń pedagogıkalyq ádis-tásilderdi qoldanýy týraly óz pikirin aıtyp, tájirıbesimen bólisti. Ol №19 mektep oqýshylarymen jáne bir jyldyq tájirıbeden ótip jatqan stýdenttermen kezdesip, túrli máseleler boıynsha pikir almasty. Rektor Ýnıversıtet basshylyǵynyń qatysýymen ótetin ashyq sabaqtar toptamasy jalǵasatynyn atap ótti. Barlyq prorektorlar men ınstıtýt dırektorlary eki apta boıy 2021 jyldyń 10 jeltoqsanyna deıin jalǵasatyn ashyq sabaqtarǵa qatysady.
Abaı ýnıversıtetiniń basshysy Darhan Bilálov stýdentterdiń úzdiksiz tájirıbeden ótýin qamtamasyz etý úshin ýnıversıtet pen orta bilim berý oryndary arasyndaǵy birlesken jumystyń mańyzdylyǵyn atap ótti. Bul is-sharalar Abaı atyndaǵy QazUPÝ men Almaty qalasy Bilim basqarmasy arasyndaǵy yntymaqtastyq týraly memorandým aıasynda júzege asyrylýda.
Memorandým aıasynda ýnıversıtet stýdentterine kásibı daǵdylaryn damytýǵa, taǵylymdamadan ótýge jáne túlekterdiń jumysqa ornalasýyna kómek kórsetedi, jastar saıasaty salasyndaǵy tıimdi yntymaqtastyq esebinen zıatkerlik elıtany qalyptastyrýǵa baǵyttalǵan basymdyqtardy, birlesken mádenı-bilim berý baǵdarlamalary men jobalaryn júzege asyrý, joǵary oqý oryndary men jalpy bilim beretin mektep oqytýshylarynyń biliktiligin arttyrý jumystary júrgiziledi.