Búginde naryqtyń 80%-dan astamyn «Damý» ATO» JSHS-ine tıesili «Damumed» júıesi qamtıdy
QR Premer-Mınıstri Álıhan Smaıylov ortalyq memlekettik organdar, Bas prokýratýra, BQDA, QMA jáne taǵy basqa vedomstvo basshylarynyń qatysýymen Ekonomıkany demonopolızasıalaý jónindegi komısıanyń kezekti otyrysyn ótkizdi, dep habarlaıdy Almaty-akshamy.kz.
Komısıa tapsyrmasyn oryndaý maqsatynda «Suıytylǵan munaı gazyn saqtaý parki» JSHS-niń 50% úlesin memleket menshigine, ıaǵnı Atyraý munaı óńdeý zaýytyna berý aıaqtalǵany atap ótildi. Atyraý oblysynyń mamandandyrylǵan aýdanaralyq ákimshilik sotynyń tıisti sheshimi zańdy kúshine endi.
Premer-Mınıstr kásiporynnyń qalypty rejımde jumysyn qamtamasyz etýdi jáne sot sheshimnen týyndaıtyn barlyq qajetti rásimderdi oryndaý boıynsha jumysty jalǵastyrýdy tapsyrdy.
Budan bólek, densaýlyq saqtaý salasyndaǵy aqparattyq qyzmetterdi kórsetý naryǵynda básekelestikti damytý sharalary qarastyryldy. Búginde naryqtyń 80%-dan astamyn «Damý» ATO» JSHS-ine tıesili «Damumed» júıesi qamtıdy. Respýblıkalyq deńgeıde medısınalyq aqparattyq júıeler arasynda derekter almasýdyń tolyqqandy tetiginiń bolmaýy naryqta básekelestikke jatpaıtyn jaǵdaılar týǵyzyp, saldarynan qazaqstandyq medısınalyq uıymdar bir medısınalyq aqparattyq júıeden basqasyna aýysqanda qıyndyqtarǵa kezigip otyr.
Osyǵan baılanysty «Damý» ATO» JSHS-i Ekonomıkany demonopolızasıalaý jónindegi komısıanyń bıylǵy jyldyń 27 sáýirindegi tapsyrmasyn oryndaý aıasynda «E-Densaýlyq» júıesi bazasynda biryńǵaı respýblıkalyq medısınalyq derekter qoryn qurý jáne medısınalyq uıymdar arasynda aqparat almasý úshin «Damumed» derekter qoryn Densaýlyq saqtaý mınıstrligine berdi. Bul úshinshi taraptaǵy qyzmet usynýshylardyń medısınalyq uıymdarǵa básekelestik negizde tıisti qyzmetter kórsetýine múmkindik beredi.
Álıhan Smaıylov «E-Densaýlyq» júıesin qurý boıynsha jumysty jedeldetý jáne osy saladaǵy retteýdiń tıimdiligin arttyrý úshin zańnamalyq túzetýler daıyndaý qajettigin atap ótti.
Keńeske qatysýshylar otyn-energetıka keshenindegi monopolıaǵa qarsy sharalardy júzege asyrý barysyn da talqylady.