Qazaqstannyń iri megapolısteri men tórt oblysy «qyzyl» aımaqta tur. Ekpe saldyrǵandar sany el turǵyndarynyń jartysyna da jetken joq.
İndetpen eki jylǵa jýyq kúresip kele jatqan dúnıe júziniń epıdemıologıalyq ahýaly qandaı ekenine sholý jasaıyq.
Ulybrıtanıada koronavırýstyq ınfeksıanyń kezekti tolqyny órship, azaımaı tur. Bul elde koronavırýstyń jańa shtamy anyqtaldy. «AY.4.2» dep atalatyn vırýs koronavırýs juqtyrǵan brıtandyqtardyń 10 paıyzynan anyqtalyp, álemge tarap ketý qaýpi týyndap otyr. Bir táýlik ishinde elde 43 738 jańa ınfeksıa jaǵdaıy anyqtaldy, COVID-19 dıagnozymen 223 naýqas qaıtys boldy. Bul 2021 jyldyń naýryz aıynyń basynan bergi ólim-jitimniń eń joǵary deńgeıi. Keshegi málimetterdi eskersek, Brıtanıadaǵy koronavırýs jaǵdaılarynyń jalpy sany 8,4 mıllıonnan asyp ketken. Qyrkúıek aıynda el Úkimeti eresek turǵyndardyń 70%-yn tolyq vaksınasıalady, biraq bul indettiń tómendeýine ákelmedi.
Iran Islam Respýblıkasy halyqty ımmýndaý úshin koronavırýstyq vaksınalar qorynyń qarqynyn arttyrýda. Irannyń qyzyl jarty aı qoǵamy elge COVID-19-ǵa qarsy ımporttyq vaksınalardyń 28-partıasyn – 6 mıllıon qos dozany jetkizdi. Sońǵy aptada bes partıa ımporttaldy, bul shamamen 30 mıllıon vaksına jıyntyǵyn quraıdy. Jalpy alǵanda, elge COVID-19-ǵa qarsy preparattardyń 82 390 000 dozasy jetkizildi. Osy ýaqytta Irannyń Densaýlyq saqtaý mınıstrligi 48 956 693 ırandyq alǵashqy dozany alǵanyn, 25 156 987 adam tolyq ımmýndaý kýrsynan ótkenin málimdedi.
Reseı Federasıasyndaǵy jaǵdaı tipten qorqynyshty. Onda vırýsty oqýshylar men jastar kóp juqtyrǵan. Oǵan qosa, syrqattanǵan qarıalar sany da artyp barady. Sońǵy táýlikte 34 myńǵa jýyq adam vırýsqa shaldyǵyp, 1015 adam kóz jumdy. Epıdahýaldyń kúrt ýshyǵýyna baılanysty jergilikti bılikti shuǵyl shara qabyldaýǵa májbúr boldy. Osy rette, búgin Úkimet otyrysynda Vladımır Pýtın jańa sheshim shyǵardy. Endi Reseıde 30 qazannan bastap, 7 qarashaǵa deıin jumys kúnderi tolyq toqtatylady. Biraq qyzmetkerlerdiń aılyǵy saqtalady. Sarapshylardyń pikirinshe, eldiń birde-bir aımaǵy vaksınasıanyń tıisti mólsherin saldyrmaǵan, sonyń kesirinen ujymdyq ımýnıtetke qol jetkize almady. Reseıde nebári 47 558 639 adam tolyq ekpe alǵan, bul el turǵyndarynyń úshten bir bóligin ǵana quraıdy.
Chehıada táýligine 3,2 myńnan astam koronavırýs tasymaldaýshysy anyqtaldy. Bul sáýirden bergi anyqtalǵan eń joǵary kórsetkish boldy. Densaýlyq saqtaý mınıstrliginiń málimetinshe, elde SARS-CoV-2 juqtyrǵandardyń jalpy sany 1 715 515-ke jetken. Chehıada COVID-19-dan qaıtys bolǵandar sany búgingi kúni 30 574 adam boldy. 102 naýqas qarqyndy terapıa bólimshelerinde em alýda. Eger statısıkany salystyratyn bolsaq, bir kún buryn Chehıada táýligine 2,5 myńnan astam jańa koronavırýs ınfeksıasy anyqtaldy.
Djakartada vaksınasıalanǵan azamattardyń koronavırýsqa qarsy vaksınanyń kem degende 1 dozasyn alǵandar kórsetkishi jaqynda 100%-ǵa jetedi. Nátıjesinde Indonezıa astanasy eń kóp qamtylǵan aımaqqa aınaldy. Egde jastaǵy adamdardyń 81,9% - y, múmkindigi shekteýli adamdardyń 96,3% - y, 12 jastan 17 jasqa deıingi balalardyń 72% - y koronavırýsqa qarsy tolyq vaksınasıadan ótti. Biraq Úkimet atap ótkendeı, Indonezıanyń basqa aýdandarynda vaksınasıamen qamtý áli de tómen jáne bılik onyń qarqynyn arttyrýǵa nıetti.