Búginnen bastap Qazaqstannyń bes qalasy – Nur-Sultan, Almaty, Shymkent, Atyraý jáne Qaraǵandyda Ashyq jobasyna qatyspaıtyn barlyq kásiporyndar men uıymdardyń qyzmeti toqtatylady.
Sonymen qatar, bul qalalarda oıyn-saýyq, sporttyq jáne basqa da buqaralyq is-sharalardy, sondaı-aq otbasylyq, estelik is-sharalardy ótkizýge tyıym salynady, dep habarlaıdy Almaty-akshamy.kz.
Bul - elimizdegi epıdemıologıalyq ahýaldyń tym nasharlap ketkendigine baılanysty qabyldanǵan qaýlynyń nátıjesinde engizilgen shekteý.
COVID-19 taralýyna jol bermeý jónindegi VAK dúnıe júziniń memleketterindegi kovıdtik jaǵdaıdyń qandaı ekenine sholý jasady.
Úndistanda koronavırýstyq ınfeksıaǵa shaldyqqandar 32 mıllıonǵa jýyqtady. Eldegi COVID-19 ınfeksıasyn juqtyrǵan turǵyndar sany 31 655 824-ke jetti. Bir táýlikte koronavırýstyń jańa túriniń 41 831 jaǵdaıy rastaldy. 541 naýqas ınfeksıadan qaıtys boldy. Osy ýaqytqa deıin COVID-19 epıdemıasy 424 351 adamnyń ómirin qıdy.
Reseıde pandemıa bastalǵannan beri ınfeksıanyń 6 288 677 jaǵdaıy tirkeldi. Sońǵy táýlikte 22 804 jaǵdaı anyqtalyp, 789 adam qaıtys boldy. Sarapshylar anyqtalǵan ınfeksıa juqtyrý jaǵdaılarynyń sany tómendep kele jatqanyn, biraq ólim-jitim kórsetkishi áli de joǵary deńgeıde ekenin aıtady. Reseıdiń týrısik aımaqtary KVI-ge qarsy qatań erejeler engizýde. Kýbandaǵy qonaq úıler tek vaksınalanǵan nemese jýyq arada COVID-19 vırýsymen aýyryp, jazylǵan týrıserdi ǵana qabyldaıdy. Sondaı-aq qonaq úıge aldaǵy úsh kúnde vaksınadan ótýge erikti túrde kelisim bergen saıahatshylardyń qonystanýyna da ruqsat beriledi.
Búgingi tańda Fılıppınde COVID-19 ınfeksıasyn juqtyrýdyń 8 735 jaǵdaıy anyqtaldy. Elde tirkelgen naýqastardyń jalpy sany 1 597 689-ǵa jetti, al epıdemıa qurbandary boıynsha kórsetkish 28 016-ny qurap otyr. Úsh kún qatarynan arhıpelagta aýrýdyń kúndelikti ósýi 8000-nan asady. KVI-diń taralýyna qarsy turý úshin Fılıppınniń Ulttyq polısıasy adamdardyń el astanasyna kirýge jáne odan shyǵýyna shekteý qoıý úshin provınsıalarmen shekaralarda qatań baqylaýdy júzege asyra bastady.
Ulybrıtanıada SARS-COV-2 juqtyrǵan jaǵdaılardyń sany 5,4 mıllıon adamnan asty. Sońǵy táýlikte 24 myńnan astam SARS-CoV-2 tasymaldaýshysy anyqtaldy. Bul birneshe kún burynǵy kórsetkishterden sál tómen, degenmen koronavırýstyq ınfeksıanyń taralý jyldamdyǵy báseńdegen joq. 01.08.2021 j. jaǵdaı boıynsha COVID-19 boıynsha rastalǵan jaǵdaılardyń sany 5 856 197-ge jetti. Sonymen qatar vırýs saldarynan kóz jumý jaǵdaılarynyń sany 129 654 adamdy qurady.
Kıpr vaksına almaǵan turǵyndar men týrıserge jańa shekteýler engizdi. 1 tamyzdan bastap aralda SafePass antıkovıdtik sertıfıkattardyń qoldanylý aımaǵy keńeıedi. Endi olar 10-nan astam adam jınalatyn nemese gıpotetıkalyq túrde jınalýy yqtımal barlyq úı-jaılarda usynylýy kerek.
Slovakıada turǵyndardy koronavırýsqa qarsy ekpe qabyldaýǵa yntalandyrý úshin lotereıa ótkizile bastaldy. Lotereıa apta saıyn qazan aıynyń sońyna deıin ótkiziledi. Ár utys oıynynyń júlde qory €2 mln. Maksımaldy utys somasy — €100 myń, mınımaldy — €1 myń.
Malaızıada koronavırýs juqtyrýdyń táýliktik ósimi boıynsha antırekord ornatyldy -17 786 jaǵdaı anyqtaldy. Sonymen qatar Japonıada ınfeksıanyń táýliktik joǵary kórsetkishi jańartyldy, 12 343 derek rastaldy.
Chılıde koronavırýs taralýynyń tómendeýi tirkeldi. Sońǵy táýlikte COVID-19 juqtyrýdyń 1 152 jaǵdaıy tirkeldi. Densaýlyq saqtaý mınıstri Enrıke Parıstiń aıtýynsha, bul - pandemıa bastalǵaly eń tómen kórsetkish. Qabyldanǵan shekteýler men vaksınasıanyń arqasynda qazir Chılı COVID-19 taralýy men aýrýhanaǵa jatqyzýdyń eń tómengi deńgeıine qol jetkizdi. Jalpy alǵanda, elde 1 615 771 aýrý jaǵdaıy tirkelip, 35 448 adam kóz jumdy.
Fransıanyń Karıb teńizindegi Martınıka aralynda COVID-19 taralýynyń kóbeıýine baılanysty lokýdaýn jarıalandy. Jergilikti aýrýhanalar tolyp, naýqastar Parıjge jiberile bastady. Infeksıa sanynyń kúrt ósýine baılanysty Úndi muhıtyndaǵy taǵy bir fransýz araly – Reıýnonda da jaǵdaı ýshyǵyp, shekteý sharalary kúsheıdi. Munyń basty sebebi, bul óńirlerde vaksınasıa deńgeıi el boıynsha eń tómengi deńgeıde.
Qytaıdyń 10-nan astam aımaǵynda koronavırýstyń órshýi tirkeldi. SARS-CoV-2 koronavırýsynyń jergilikti oshaqtarynyń tez taralýy sońǵy birneshe kúnde eldiń materıktegi 14 provınsıasynda tirkeldi. Naýqastardyń 25% -y koronavırýsty el aýmaǵynda juqtyrǵany anyqtaldy. Eń ýshyqqan epıdemıologıalyq jaǵdaı Szánsý provınsıasynda tirkeldi, onda COVID-19 ınfeksıasynyń 245 jaǵdaıy anyqtaldy.
Ýganda Qytaı Halyq Respýblıkasynan COVID-19 vaksınasynyń qaıyrymdylyq partıasyn aldy. Vaksınany berý kezinde elshi Chjan Lıchjýn Qytaı men Ýganda halyqtary koronavırýstyq indetke qarsy kúreste bir-birine ózara kómek jáne moraldyq qoldaý kórsetetinin atap ótti. Epıdemıa bastalǵannan beri QHR úkimeti Ýganda tarapyna birneshe ret epıdemıaǵa qarsy kómek kórsetti, bul vırýsqa qarsy tıimdi áreket etýge jol ashty.