Coursera-nyń 2025 jylǵa arnalǵan Jahandyq daǵdylar jónindegi esebi (Global Skills Report 2025) jarıalandy
Bul 109 elden 170 mıllıonnan astam paıdalanýshynyń derekterine negizdelgen sıfrlyq jáne kásibı daǵdylar boıynsha jyl saıynǵy ǵalamdyq sholý, dep habarlaıdy aqshamnews.kz.
Oqý-aǵartý mınıstrliginiń málimetinshe, Qazaqstan Jahandyq daǵdylar reıtıńinde 37-orynǵa jáne Jasandy ıntellektiniń jetilý ındeksi (AI Maturity Index) boıynsha 51-orynǵa ıe bolyp, kadrlar daıarlaý salasynda básekege qabiletti elder qataryndaǵy ornynyń turaqtylyǵyn rastady.
Elde eń suranysqa ıe baǵyttarǵa qyzyǵýshylyqtyń aıtarlyqtaı artqany baıqalady: generatıvti JI kýrstaryna tirkelý 383 paıyzǵa, kıberqaýipsizdik kýrstaryna qyzyǵýshylyq 80 paıyzǵa, synı oılaý kýrstaryna qyzyǵýshylyq 43 paıyzǵa, kásibı sertıfıkattardy alý 50 paıyzǵa artqan. Qazaqstan sıfrlyq ınklúzıa deńgeıiniń joǵarylyǵymen erekshelenedi: bilim alýshylardyń 56 paıyzyn áıelder quraıdy, al 62 paıyzy oqýdy mobıldi qurylǵylar arqyly alyp jatyr. Bul oqytýdyń turǵylyqty jerine qaramastan qoljetimdi ekenin kórsetedi.
Mundaı nátıjelerge QR Ǵylym jáne joǵary bilim mınıstrligi úılestiretin Coursera Qazaqstan ulttyq bastamasyn iske asyrý arqyly qol jetkizildi. Aıtalyq, Coursera jobasyna 2023 jyly elimizdiń 25 joǵary oqý orny, 2024 jyly 93 joǵary oqý orny qatyssa, 2025 jyly 95 joǵary oqý orny qatysty. Stýdentterge álemniń jetekshi ýnıversıtetteri men kompanıalarynyń 14 000-nan astam kýrsy qoljetimdi boldy. Mınıstrlikten berilgen lısenzıalar aıasynda úsh jylda platforma arqyly 167 372 stýdent oqýdan ótti, 288 347 sertıfıkat berildi. 2025 jyly AI Sana jobasy aıasynda jasandy ıntellekt boıynsha jeke trek iske qosylyp, onyń sheńberinde 47 399 sertıfıkat tabystaldy. Bul derekter onlaın oqytýdyń jáne mıkroquzyretterdiń jańa ekonomıka kadrlaryn daıarlaýdaǵy, sondaı-aq Qazaqstannyń joǵary bilim berý júıesin ornyqty damytýdaǵy strategıalyq mańyzyn dáleldeıdi.
Aıta keteıik, esepte bilim alýshylardyń minez-qulyq derekteri men makroekonomıkalyq kórsetkishterdi biriktiretin jańa 3.0 ádistemesi qoldanylǵan. Bul kórsetkishterge adamı kapıtal ındeksi, eńbek naryǵyna qatysý deńgeıi, jan basyna shaqqandaǵy JİÓ jáne Jahandyq ınovasıalyq ındeksi jatady. Sonymen qatar Coursera derekteri men Halyqaralyq valúta qory, EYDU sıaqty halyqaralyq derekkózder negizinde elderdiń jasandy ıntellektini engizýge daıyndyǵyn baǵalaıtyn AI Maturity Index alǵash ret usynyldy.