Almatydaǵy oqýshylardyń 96%-ǵa jýyǵy jazǵy demalysta saýyqtyrý sharalarymen jáne túrli úıirmelermen qamtylǵan, - dep habarlaıdy aqshamnews.kz.
2025 jyldyń jazǵy maýsymynda Almaty qalasynda 281 myń oqýshy jazǵy demalysta saýyqtyrý sharalarymen jáne túrli úıirmelermen qamtyldy. Bul kórsetkish 1-10 synyp aralyǵynda oqıtyn almatylyq 293 682 balanyń 95,7 paıyzyn quraıdy. Al, 2024 jyly jazǵy demalysta uıymdastyrylǵan sharalarǵa 266 343 oqýshy qatysqan edi.
Bıyl mektep janyndaǵy lagerlerdiń jumysy erekshe mazmundy ári qyzyqty ótýde. Munda balalar jent jasaýdy, qurt jaıyp, keptirýdi, keste tigip, toqyma toqýdy, qolmen sómke tigýdi úırenip jatyr. Sonymen qatar, olar qazaqtyń dástúrli oıyndary – hantalapaı, asyq atý, sondaı-aq qazaq kúresiniń negizderimen tanysýda. Budan bólek, balalar baǵdarlamalaý men robototehnıkaǵa mashyqtanyp, dombyra, jetigen, baıan jáne basqa da ulttyq mýzykalyq aspaptarda oınaýdy úırenýde. Sportqa da erekshe kóńil bólingen: balalar fýtbol, basketbol, voleıbol oınap, ashyq aýada túrli estafetalarǵa qatysyp jatyr. BAQ ókilderi baspasóz týry aıasynda birneshe mektep janyndaǵy lagerge baryp, balalarmen jáne bilim berý salasynyń ókilderimen suhbattasty.
Almaty qalasy Bilim basqarmasy basshysynyń orynbasary Muhtar Tájibaevtyń aıtýynsha, qalada IT-daǵdylardy damytýǵa, otbasylyq qundylyqtardy nyǵaıtýǵa jáne patrıottyq tárbıeni kúsheıtýge baǵyttalǵan taqyryptyq lagerler jumys istep jatyr. Bul rette Memleket basshysynyń tapsyrmasymen júzege asyp jatqan "Adal azamat" birtutas tárbıe baǵdarlamasyna erekshe mán berilip jatyr.
"Qalada 200-den astam jalpy bilim beretin mektep bar. Bıyl oqý jyly aıaqtalǵannan keıin birden mektep janyndaǵy lagerler jumysyn bastady. Eń bastysy – balalar lagerge jergilikti búdjet esebinen tegin baryp júr. Sondaı-aq, 26 mamyrdan bastap 9 maýsymǵa deıin bastaýysh synyp oqýshylary men áleýmettik osal toptaǵy balalar lagerlerde tegin tamaqpen qamtyldy. Endi búginnen bastap maýsym aıynyń sońyna deıin lagerler tańerteńnen túske deıin jumys isteıtin bolady, biraq bul kezeńde tamaqtaný qarastyrylmaıdy. Balalar ádettegideı mektep janyndaǵy lagerlerge tegin bara beredi. Al shilde aıynda mektepter jańa oqý jylyna daıyndyq júrgizip, jóndeý jumystaryna kirisedi. Keıin tamyz aıynda lagerler qaıta ashylyp, taǵy tańerteńnen túske deıin balalardy tegin qabyldaıtyn bolady. Sonymen qatar, jaqyn arada qala syrtyndaǵy lagerler de jumysyn bastaıdy. Qazir balalardy demalysqa qabyldaýǵa daıyn uıymdar arasynda konkýrs ótip jatyr. Budan bólek, qosymsha bilim berý úıirmeleri de óz jumysyn jalǵastyrýda. Qalada 19 memlekettik jáne 122 jekemenshik qosymsha bilim berý mekemesi bar. Onda 40 myńnan astam bala memleket esebinen qosymsha bilim alyp jatyr", – dedi Muhtar Tájibaev.
Máselen, №140 mektep janyndaǵy sporttyq baǵyttaǵy lagerde 5–6 synyp oqýshylary ártúrli sport túrleri boıynsha tereńdetilgen daıyndyqtan ótýde. Munda voleıbol, fýtbol, toǵyzqumalaq jáne basqa da ulttyq oıyndar boıynsha jattyǵýlar ótkizilýde. Lager baǵdarlamasy teorıalyq bilim berýdi de qamtıdy – bul balalardyń sporttyq tártibin nyǵaıtyp, komandalyq rýhyn qalyptastyrady.
№97 mektep janynan ashylǵan "Arman" lagerinde balalar sporttyq jáne shyǵarmashylyq sharalarǵa, ekskýrsıalar, zıatkerlik oıyndar men sheberlik sabaqtarǵa qatysyp jatyr.
Almaty qurylys-tehnıkalyq koleji bazasynda "Jazda mamandyq tańdaıyq" atty baǵdarlama júzege asyrylypa jatyr. Munda joǵary synyp oqýshylary aǵash óńdeý isin, grafıkalyq dızaındy meńgerip, qural-saımandarmen jumys isteýdi, sondaı-aq SketchUp arqyly 3D-modeldeýdiń negizderin úırenýde. Bul baǵdarlama balalarǵa alǵashqy kásibı daǵdylardy meńgerýge múmkindik beredi.
Patrıottyq jáne mádenı tárbıege de erekshe nazar aýdarylyp jatyr. №208 mektep janynan ashylǵan "Etno City" etnolageri – jas urpaqtyń boıynda patrıottyq sezim men ulttyq mádenıetke degen qurmetti qalyptastyratyn erekshe alań. Munda balalar qazaqtyń salt-dástúrimen tereń tanysyp jatyr. Lagerde birneshe kıiz úı tigilip, olardyń árqaısysy jaı sándik element emes, bilim berý keńistigine aınalǵan. Baǵdarlama aıasynda ulttyq qolóner boıynsha sheberlik sabaqtary ótkizilip, balalar qazaqtyń áshekeı buıymdary men turmystyq zattaryn jasaýdy úırenýde. Sporttyq jáne ulttyq oıyndar arqyly olar dene shynyqtyrýmen qatar, qazaq halqynyń kóne dástúrleri men jarys mádenıeti jaıynda mol maǵlumat alyp jatyr.
Naýryzbaı aýdanyndaǵy Oqýshylardyń ınovasıalyq shyǵarmashylyǵy ortalyǵynda ashylǵan IT-lagerde 7 jastan 15 jasqa deıingi balalar baǵdarlamalaý negizderin meńgerip, elektronıkamen tanysyp, túrli ǵylymı tájirıbelerge qatysýda. Munda balalar mýzakalyq dáristerge qatysyp, aspaptarda oınaýdy jáne kıim tigýdi úırenip jatyr.
Jalpy, Almaty mektepterindegi jazǵy lager baǵdarlamalary balalarǵa tek demalýǵa ǵana emes, ýaqytty tıimdi ótkizýge, jańa bilim men daǵdylardy meńgerýge, shyǵarmashylyq qabiletterin damytýǵa keń múmkindik beredi.