Atyraýlyq sýretshi jeli qoldanýshylaryn tańǵaldyrdy.
Atyraýda Sandero markaly kóliktiń artqy terezesine Olımpıada chempıony Eldos Smetovtiń portretin salyp alǵan júrgizýshi el nazaryn aýdardy, dep habarlaıdy aqshamnews.kz
Erekshe kartınanyń avtory 34 jastaǵy atyraýlyq Aslan Jazıkov Eldos Smetovtiń Olımpıadadaǵy tarıhı jeńisinen keıin shabyttanyp, kóliginiń áınegine chempıonnyń sýretin aınytpaı salǵan. Avtordyń týyndysy sirińkeniń taly men maqta taıaqshasynyń kómegimen salynǵan.
"Dzúdoshy Eldos Smetovtyń Olımpıadadaǵy jekpe-jegin kórip qatty qýandym. Shabyt kelip, birden kóligimniń terezesine portretin sala bastadym. Týyndym tez ári ońaı jasaldy. Osylaısha qazaq sportshysyna qoldaý bildirdim. Qala kóshelerinde sıgnal berip, jumysymdy baǵalap jatqandar kóp", - deıdi Aslan Jazıkov.
Bul avtordyń alǵashqy týyndysy emes. Buǵan deıin ol Eldos Smetovtiń jáne basqa da sportshylardyń portretin aǵashtan oıyp jasaǵan. Atyraýlyq jigit kishkentaı kezinen sýret salýǵa ıkemi bolǵanyn aıtady. Biraq baǵdarlamashy mamandyǵyn meńgerip, qazirgi kezde jeke kompanıalardyń birinde strategıalyq damý bóliminde qyzmet atqarady.
"Sýretti tek hobbı úshin salamyn. Eshqandaı tapsyrys almaımyn. Ondaıǵa qolym júrmeıdi. Shabyt kelgen ýaqytta ǵana sýret salamyn",- deıdi ol.
Aslan otbasyly, úsh balanyń ákesi, balalary da sýretke ıkemi bar ekenin aıtady. Al 9 jastaǵy qyzy Darıa dzúdomen aınalysady, týrnırlerdiń jeńimpazy.