Býyndardy qabyndyratyn revmatoıdty artrıt – etıologıasy belgisiz sozylmaly aýtoımmýndy aýrý.
Ótken ǵasyrdyń 80-90 jyldarynda bul negizinen jastar (20-40 jas) derti bolyp sanalǵan. Búginde adam 50, 70 jáne 80 jasynda da aýyryp qalýy múmkin. Revmatoıdty artrıtpen kishkentaı balalar da (negizinen 1 jastan 3 jasqa deıin) aýyrady, biraq eresekterge qaraǵanda jeńil ótedi.
Bári qarapaıym sýyqtanýdan bastalady. Ádette aldymen jalpy álsizdik, sharshaý paıda bolady. Birtindep olarǵa bulshyqetterdiń aýyrýy, tersheńdik, temperatýranyń joǵarylaýy qosylady. Sodan keıin býyndar aýyrsyna bastaıdy. Aýrý kez-kelgen býynǵa áser etýi múmkin. Tyrnaqtyń synǵyshtyǵy, qańqa bulshyqetteriniń álsireýi, plevrıttiń damýy, ókpe tinderiniń zaqymdalýy da yqtımal. Olar revmatoıdty túıinderdiń paıda bolýymen birge júredi jáne teriniń astynda tyǵyz shar túrinde seziledi.Polıartrıttiń negizgi belgisi – saýsaq býyndarynyń sımmetrıaly zaqymdanýy. Tek osy sımptomǵa súıene otyryp, dıagnoz qoıýǵa bolady. Eger tize býyny aýyrsa, bul basqa aýrýlardyń belgisi bolýy múmkin. Ekinshi belgisi – tańerteń oıanǵan adam alaqanyn qysa almaı qalady.
Revmatoıdty artrıttiń naqty sebepteri álem boıynsha áli anyqtalmaǵan. Syrtqy áserdiń nátıjesinde (vırýstyq ınfeksıa, kúızelis, sýyq tıý nemese kerisinshe ystyq ótý) ımýnıtet durys jumys istemeıdi.
Almatydaǵy Kardıologıa jáne ishki aýrýlar ǴZI №2 terapıa bólimshesiniń revmatolog-dárigeri Marjan Abdýllaevanyń aıtýynsha, polıartrıtti emdeý úshin qazirgi zamanǵy medısınada bazıstik terapıany (ımýndyq júıe jasýshalarynyń antıdeneler óndirisiniń belsendiligin tómendetetin em) paıdalanady. Bul terapıanyń ereksheligi – em alǵashqy kúnnen bastap jáne ómir boıy júrgiziledi. Naýqas dári-dármekti únemi qabyldaýy kerek. Mundaı jaǵdaılarda aýrý ýaqyt óte kele basylady jáne adamnyń ómir súrý sapasy jaqsy jaqqa ózgere bastaıdy. Emdeý aýrýdyń belsendiligi men uzaqtyǵyna baılanysty. Ár naýqas úshin jeke emdeý sqemasy tańdalady.
– Bazıstik preparattarmen standartty terapıanyń tıimdiligi jetkiliksiz bolǵan jaǵdaıda gendik-ınjenerlik bıologıalyq terapıa qoldanylady. Sondyqtan negizgi terapıamen birge aýyrsynýdy jeńildetý úshin tez áser etetin steroıdty emes qabynýǵa qarsy preparattar, keıde glúkokortıkosterıodtar qoldanylady. Remısıaǵa jetý úshin negizgi terapıany úzdiksiz júrgizý mańyzdy. Bul qyzdyrǵysh gelder, jaqpa maılar bolýy múmkin, olar óte tereń enip, býynnyń ózine áser etedi, biraq áser etý úshin jaqpa kúnine eki ret qoldanylýy kerek. Steroıdty emes preparattar qabynýdy, aýyrsynýdy tómendetýi múmkin, – deıdi dáriger.
Mıneraldy sýlar, emdik vanalar aýrýdyń tómen belsendiligimen nemese remısıamen adam densaýlyǵyna paıdaly áser etedi. Sondyqtan aldymen stasıonarda emdelip, sodan keıin fızıoterapıalyq emdeýden ótken jón (jarty jylda 1 ret), kún saıyn arnaıy emdik gımnastıka jasap, jylyna bir ret tirek-qımyl apparatynyń aýrýlary emdeletin shıpajaıǵa barǵan tıimdi deıdi dáriger.