13 jasynda nebári 6 sekýndta qusty qolyna qondyrǵan qazaqtyń búrkitshi qyzy Aısholpan rekord ornatqan edi.
Sodan bastap onyń esimi álemniń ár túkpirindegi týrıser nazaryn aýdardy. Aısholpannyń ákesi búrkit arqyly týrızmdi damytýǵa bolady eken degen oı aıtty, dep habarlaıdy Almaty-akshamy.kz.
Bozanbaı aýylynda ótken búrkitshilerdiń halyqaralyq festıvalinde qazaqty álemge tanytqan Aısholpan Nurǵaıyp arnaıy qonaq boldy.
Ulan aýdanyna qarasty Bozanbaı aýylynda ótken "Shyǵys salbýryny – 2023" saıysy 70-ten astam búrkitshiniń basyn qosty. Uıymdastyrýshylardyń sózinshe, osy jyly qus kótergen jastar qarasy kóp. Olardyń ónerin tamashalap, qonaq retinde kelgen Aısholpan qalyń jurttyń ortasynda qalyp, týrıser onymen alma-kezek sýretke tústi. Ákesi Nurǵaıyp Yrysulynyń sózinshe, ár jyly Mońǵolıanyń Baıan ólgeı aımaǵynan kelip turý ádetke aınaldy.
"Halyq osylaı jınalyp, qazaqtyń salt-dástúri jańǵyryp jatsa nesi aıyp?! Kóbi qar jaýmaı, arasynda jańbyr sirkirep ketýi búrkitterge kedergi boldy dep jatty. Negizi, bul qustyń aýa-raıy. Tabıǵat bárin bizdiń yńǵaıymyzǵa buryp bermeıdi. Mundaǵy jarysqa kil myqtylar jınalypty. Shyrǵaǵa qondyrý kezinde múmkindikterin múlt jibergenderi ilýde bireý", – dedi ol.
Kásibı búrkitshiniń aıtýynsha, tól ónerdiń arqasynda qazaq mádenıetimen tanysýǵa nıettiler sany kúrt artqan.
"Qazaqty álemge tanytqan jandardyń biri, Aısholpan qyzymdy kórý úshin úıime 3000-daı týrıs keldi. Eýropadan atizin salǵandar "bular asqan qonaqjaı halyq eken" desti. Jalpy, búrkit turǵan jerde týrızmge jol ashylady eken", – dedi Nurǵaıyp Yrysuly.
Búrkitterdiń salmaǵy ary ketkende 8 kelige deıin barady. Mońǵolıalyq qusbegiler Baıan ólgeıdiń taýly aımaqtarynda qyran quspen qasqyr alǵandaryn jetkizdi. Qystyń 40 gradýs aıazynda qasqyr ishik kıip, ańshylyqtyń qyzyǵyna túsedi. Nurǵaıyp Yrysuly búrkitshi retinde álemniń 33 elin aralaǵan. Kórgen-bilgenin Aısholpanǵa aıtyp keledi.
"Bıylǵy festıváldiń deńgeıi joǵary. Ádet-ǵurpymyzdyń osylaı dáriptelýi men úshin úlken maqtanysh. Bozanbaı aýylyna kóptegen sheteldik týrıser keldi. Soǵan oraı ár qatysýshynyń ákelgen búrkit, suńqarynyń daıyndyǵy kelisip tur eken", – dedi Aısholpan.