«Bitim» (La Tregua) dep atalatyn Karlag tarıhyna negizdelgen týyndy kınoteatrlar men strımıng platformalarynda kórsetiledi
Comic Con Astana 2025 festıvalinde Qazaqstan men Ispanıa arasyndaǵy alǵashqy halyqaralyq birlesken joba – «Bitim» (La Tregua) fılminiń tusaýkeseri ótedi. Bul týyndy jahandyq prokat pen Netflix strımıng platformasyna arnalyp túsirilgen, dep habarlaıdy aqshamnews.kz.
Karlagtyń qaıǵyly tustaryn qozǵaıtyn «Bitim» (La Tregua) fılmin rejıser Mıgel Anhel Vıvas túsirýde. Onyń shyǵarmashylyq qorynda aty ańyzǵa aınalǵan «Býmajnyı dom» (La Casa de Papel) serıalyndaǵy epızodtar, Mettú Foks túsken postapokalıptıkalyq trıller «Extinction» («Vymıranıe») jáne horror Inside («Vnýtrı») fılmi bar.
Fılmniń oqıǵasy 1937-1945 jyldary Qazaqstandaǵy Karlagta órbıdi. Bul lagerde álemniń túkpir-túkpirinen ákelingen tutqyndar bolǵan. Týyndynyń basty jelisinde – azamattyq soǵystyń alapat jeli eki jaqqa aıyrǵan qos ıspan azamaty men adam tózgisiz jaǵdaıda adamgershiligi men qaısarlyǵynan aınymaǵan qazaq zıalysy tur. Fılm tarıhı jady, jeke tańdaý men rýhtyń myzǵymastyǵyn basty taqyryp etedi. «Bitim» fılmi keıipkerleriniń taǵdyry arqyly Qazaqstannyń mıllıondaǵan adam úshin ekinshi Otanǵa qalaı aınalǵany aıqyndalady. Sondaı-aq, qıyn-qystaý zamanda yntymaq, janashyrlyq pen mádenıettiń adamzat úmitiniń tiregi bolǵany kórsetiledi.
Fılm postprodakshnniń sońǵy satysynda tur. Qazir orys jáne qazaq tilderinde dýbláj jasaýǵa daıyndyq jumystary júrip jatyr. Premera 2025 jylǵy kúzdiń sońy – qys mezgiline qaraı josparlanǵan. Al qyrkúıekte fılm San-Sebastán halyqaralyq kınofestıvalinde (Festival Internacional de Cine de San Sebastián) konkýrstan tys usynylatyn bolady.
Fılmge Netflix-tiń tanymal jobalary arqyly álemge áıgili bolǵan akterler Mıgel Erran («Býmajnyı dom») jáne Aron Pıper («Élite») túsken. Qazaqstandyq akterlerden fılmde Dına Tasbolatova, Sergeı Ýfımsev, Altynaı Nógerbek pen Farabı Aqkózov oınady.
Rejısermen birge «Bitim» jobasynyń atqarýshy prodúseri Emılıo A. Pına da konventke qatysady. Onyń qorjynynda «Propavshıe bez vestı», «Insıdent» sekildi 20-dan astam joba bar. Sondaı-aq, Emılıo Pına Ispanıanyń ulttyq kınopremıasy – «Goııa» syılyǵyn bes márte uıymdastyrǵan.
Delegasıaǵa sondaı-aq UMAIFILM-nyń Bas prodúseri Erlan Halıjanuly Bekhojın qosylady. Ol – «Habar» agenttiginiń eks-Basqarma Tóraǵasy, elimizdiń iri medıamenedjerleriniń biri jáne aýdıovızýaldyq kontent salasynda halyqaralyq yntymaqtastyqty nyǵaıtýǵa úles qosýshy.
Fılm óndirisi Ispanıanyń Plano a Plano kınokompanıasy men Qazaqstannyń Amanat Capital kompanıasy arasyndaǵy alǵashqy halyqaralyq yntymaqtastyq aıasynda júzege asyrylýda. Ispanıa tarapynan jobaǵa aýdıovızýaldyq kontent jasaýda mol tájirıbesi bar prodúserler Sezar Benıtes, Emılıo Amare jáne Emılıo A. Pına jaýapty. Qazaqstan tarapynan fılmniń bas prodúseri – Amanat Konaqbaev. Prodúserler quramyna Daır Qarakeev, Daýren Baıǵalıev jáne UMAIFILM kompanıasynyń prodúserleri Jarasqan Qulpıenov pen Álıa Dalabaeva kiredi. Qazaqstan komandasynyń úılestirýimen belgili medıamenedjer, jýrnalıs jáne prodúser Erlan Halıjanuly Bekhojın aınalysady.
Comic Con Astana-2025 festıvál tarıhyndaǵy eń iri sharaǵa aınalyp, TMD aýmaǵyndaǵy pop-mádenıet salasynyń eń iri oqıǵalarynyń birine aınalady. 2025 jyly festıvál bes kúnge sozylyp (9-nan 13 shildege deıin) alǵash ret eki iri alańda ótedi: «Astana-Arena» stadıony men MLD «Barys-Arena».
2019 jyly qurylǵan sátinen bastap konvent jergilikti sharadan halyqaralyq deńgeıdegi tolyqqandy platformaǵa aınaldy. Ol kınoındýstrıa, anımasıa, komıks, vıdeooıyndar, kospleı jáne sıfrlyq óner salasynyń ókilderin biriktiredi.
Festıvaldiń hedlaıneri – brıtandyq akter, rejıser jáne sıfrlyq keıipkerlerdi ekranǵa shyǵarý salasyndaǵy jańashyl adam Endı Serkıs. Ol – qozǵalysty túsirý tehnologıalaryn damytý arqyly kıno ındýstrıasynda tóńkeris jasaǵan tulǵa. Eń tanymal rólderi: Gollým («Saqınalar ámirshisi»), Sezar («Maımyldar planetasy»), Joǵarǵy kóshbasshy Snoýk («Juldyzdar soǵysy»), Alfred Pennıýort («Betmen», 2022), Kıng-Kong (Pıter Djekson remeıki), Ýlıss Klo (Marvel álemi), Kıno Loı («Andor»). Sonymen qatar Serkıs «Venom 2», «Maýglı» jáne jaqynda jaryq kóretin «Saqınalar ámirshisi: Gollýmǵa ańshylyq» fılmderiniń rejıseri.
Buǵan deıin Comic Con Astana festıvaliniń hedlaıneri retinde álemdik ındýstrıanyń tanymal juldyzdary óner kórsetti, olardyń qatarynda Mads Mıkkelsen, Pılý Asbek, Maıkl Rýker, Shon Gann, Persı Haıns Ýaıt jáne basqalary bar.