Qazaqstanda qyzdy turmysqa shyǵýǵa zorlap májbúrleý úshin qylmystyq jaýapkershilik resmı túrde engizildi, - dep habarlaıdy Aqshamnews.kz tilshisi.
İİM málimetinshe, 16 qyrkúıekten bastap elimizde azamattardyń quqyǵyn qorǵaýdy kúsheıtetin Qylmystyq zańnamaǵa ózgerister kúshine endi.
Negizgi ózgeristerdiń biri – Qylmystyq kodekstiń 125-babyndaǵy eskertpeni alyp tastaý. Buǵan deıin jábirlenýshini óz erkimen bosatqan adam qylmystyq jaýapkershilikten qutyla alatyn. Endi bul múmkindik joıyldy: kináliler keıingi áreketterine qaramastan jazalanady.
Neke qıýǵa májbúrleý týraly jańa bap
Kodekske 125-1-bap «Neke qıýǵa májbúrleý» engizildi. Endi mundaı áreket qylmystyq quqyqbuzýshylyq bolyp sanalady. Jaǵdaıǵa baılanysty jaza 2000 AEK-ke deıin aıyppul, túzeý nemese qoǵamdyq jumystar, bostandyqty shekteý ne eki jylǵa deıin bas bostandyǵynan aıyrýdy qamtýy múmkin.
Eger qylmys saldarynan abaısyzda aýyr zardap kelse, bes jyldan on jylǵa deıin bas bostandyǵynan aıyrylýy múmkin. Eger zorlyqpen májbúrlense, kámeletke tolmaǵandarǵa qatysty bolsa, toppen jasalsa, qyzmettik ókilettigin nemese jábirlenýshiniń táýeldiligin paıdalansa, qatańyraq sharalar qoldanylady.
Quqyq qorǵaýshylardyń aıtýynsha, árbir mundaı jaǵdaı – tek zańbuzýshylyq emes, qyz ben onyń otbasy úshin aýyr synaq. Jábirlenýshiler tek fızıkalyq jáne psıhologıalyq zorlyqqa emes, sonymen qatar, «otbasyńdy uıatqa qaldyrma» dep qysym kórsetetin týystarynyń sózine tap bolady.
Aýyr psıhologıalyq zardaptar
Mamandardyń aıtýynsha, mundaı oqıǵalardan keıin qyzdarda mazasyzdyq, depressıa, úreı jáne aınalasyndaǵylarǵa senimsizdik qalyptasady.
Eske salaıyq, 16 shildede Prezıdent Qasym-Jomart Toqaev «Qazaqstan Respýblıkasynyń qylmystyq zańnamasyn ońtaılandyrý máseleleri boıynsha Qazaqstan Respýblıkasynyń keıbir zańnamalyq aktilerine ózgerister men tolyqtyrýlar engizý týraly» zańǵa qol qoıǵan bolatyn. Sol túzetýlerdiń biri – qalyńdyqty urlaý úshin qylmystyq jaza engizý edi.