Áýezov aýdanynda №86 úı men áskerı mektep arasynda ornalasqan Pátnıskıı kóshesiniń boıyndaǵy bos aýmaqty abattandyrý jumystary aıaqtaldy. Ony «Sultan qurylys» JSHS merdigerlik uıymy bıylǵy «Halyq qatysatyn búdjet» jobasy aıasynda júzege asyrdy. Bul týraly Áýezov aýdanynyń ákimdigi habarlady.
Buryndary ıesiz, bos jatqan jerde búginde zamanaýı demalys aımaǵy paıda boldy. Munda otbasymen serýendeýge, tynyǵýǵa bolady. Jańa nysanda balalar men sport alańdary, jaıaý júrginshi joly men áńgimelesýge arnalǵan aımaqtar bar.
Jańa demalys aımaǵyna asfált tóselgen, zamanaýı jaryq berý júıesi ornatylyp, jaıly oryndyqtar qoıylǵan. Segizdik pishininde jasalǵan uzyndyǵy 20 metr bolatyn erekshe oryndyq kóz tartady. Balalarǵa arnalǵan keshende átkenshekter bar, al oıyn alańy ádemi túrde kómkerilgen. Jastar men eresekter úshin vorkaýt, tartan jabyny bar trenajer alańy jasalǵan.
Aýdan ákimdigi atap ótkendeı, aýmaqty kógaldandyrýǵa basa nazar aýdarylǵan. Demalys aımaǵyna aǵashtar men butalar otyrǵyzyldy, 800 butadan tabıǵı qorshaý jasaldy, avtomatty sýarý júıesi iske qosyldy.
Jańa nysan ashyq aýada sportpen shuǵyldanýǵa, otbasymen birge serýendeýge arnalǵan yńǵaıly ári abattandyrylǵan keńistikke aınaldy.