Almatyda aqyn, halyqaralyq «Alash» ádebı syılyǵynyń laýreaty Ádilǵazy Qaıyrbekov daýys berdi, dep habarlaıdy Almaty-akshamy.kz Egemen.kz-ke silteme jasap.
Aqynnyń aıtýynsha, eldiń bolashaǵy úshin daýys berý - úlken jaýapkershilik.
«Búgingi naýqan – halyqtyń kópten kútken saılaýy. Óıtkeni bul saılaýda kóptegen jańalyqtar, ózgeshelikter bar. Óziń tańdaıtyn partıaǵa daýys bere alatyn múmkindik berilgen, munyń bári halyqta senim oıatty dep oılaımyn. Kóppartıalylyqtyń ishinen tańdaý da ońaı emes. Baǵdarlamalarynyń bárin qaradyq, uqsastyqtary kóp. Degenmen halyq kóńili qalaǵan partıaǵa daýys beredi. Endi saılaý mádenıti degen bar, sol halyqqa durys nasıhattalýy kerek. Sonda búginimiz úshin, bolashaǵymyz úshin, urpaqtyń bolashaǵy úshin saılaýǵa kelip daýys berý – bul úlken jaýapkershilik. «Meniń daýysym qaıbir nárseni sheshedi» dep qalys qalýshylyq durys emes. Bizdiń halyq óz bolashaǵyn, óz tańdaýyn bos jiberip almaýy kerek», - dedi ol.
Aıta keteıik, búgin Parlament Májilisiniń jáne jergilikti máslıhattar depýtattarynyń kezekten tys saılaýy ótip jatyr. Saılaý ýchaskeleri tańǵy 07:00-de ashyldy. Daýys berý keshki 20:00-ge deıin jalǵasady.