QR Úkimetiniń 2021 jylǵy 30 maýsymdaǵy №449 Qaýlysyna sáıkes, maýsym aıynyń ekinshi jeksenbisi Malshylar kúni bolyp bekitilgen. «Shopan-ata» Qazaqstan qoı ósirýshiler Ulttyq qaýymdastyǵynyń tóraǵasy Almasbek Sadyrbaev QazAqparat tilshisine osy ataýly kúnniń nege keń aýqymda merekelenbeı jatqany týraly pikirin aıtty, dep habarlaıdy Almaty-akshamy.kz Inform.kz-ke silteme jasap.
«Qazaqta jaqsy sóz bar. «Ákimi aqynyn izdegen el ozady, aqyny ákimin izdegen el tozady» deıdi. Byltyr Prezıdentke usynys aıtyp, hat jazdyq. Ol kisi qoldap, Malshylar kúnin Memlekettik merekeler kúntizbesine bekitý týraly tapsyrma berdi. Aýyl sharýashylyǵy mınıstrligi sony alyp, kúntizbege engizýge qaýqary jetpedi. Sonda Prezıdenttiń sheshimi bar, Úkimettiń qaýlysy bar. Al Aýyl sharýashylyǵy mınıstrliginen bir maman Elektrondy Úkimet portalyna habarlasyp, Úkimet qaýlysy boıynsha Memlekettik merekeler kúntizbesine Malshylar kúnin qosý kerek dep aıtýy kerek edi. Qarap otyrsańyz jaı bir tehnıkalyq másele ǵana. Sony da jasamaǵan. Shalaǵaılyqtyń saldar y nan qazaq sharýalarynyń osylaı eskerýsiz qalyp jatqany ókinishti», - deıdi Almasbek Sadyrbaev.
Onyń oıynsha, bul kúnde tym bolmaǵanda salaǵa jaýapty basshylardyń áleýmettik jelide sharýalardy quttyqtaýyna bolatyn edi.
«Oblys ákimderi, Úkimet basshysy, Aýyl sharýashylyǵy mınıstri sharýalardy kásibı merekesimen quttyqtap, tym bolmaǵanda áleýmettik jelige salsa, sol da jeter edi. Biraq olar quttyqtamady eken dep, «tonymyzdy otqa jaqpaımyz». Qudaıǵa shúkir, qarapaıym el quttyqtap, BAQ ókilderi izdep jatyr. Óz atymnan áriptesterimdi ortaq merekemen quttyqtaımyn. Órisimiz, qoramyz malǵa tolsyn. Úıimiz janǵa tolsyn. Eldiń azyq-túlik qaýipsizdigin qamtamasyz etý degen asyl mindetti abyroımen atqara bereıik. Ár qazaq maldy, jandy bolsyn!» - dep túıindedi.
Osy suraqty QR Aýyl sharýashylyǵy mınıstrliginiń baspasóz qyzmetine de qoıdyq. Ondaǵylar mınıstrdiń quttyqtaýy vedomstvonyń resmı saıtyna sál keıinirek jarıalanatynyn aıtty. Atalǵan saıtta 14 mamyrda jarıalanǵan resmı derek boıynsha, 2022 jyly mal sharýashylyǵyn sýbsıdıalaýǵa shamamen 124,6 mlrd teńge baǵyttalady. Bul salada memlekettik qoldaýmen sýbsıdıalaýdyń 30-ǵa jýyq baǵyty kózdelip otyr. Al 2021 jyly asyl tuqymdy mal sharýashylyǵyn damytýǵa, mal sharýashylyǵynyń ónimdiligin jáne ónim sapasyn arttyrýǵa ákimdikter 108,1 mlrd teńge baǵyttalyp, respýblıkalyq búdjetten qosymsha 13,6 mlrd teńge bólingen.
Eske salsaq, Malshylar kúnin kúntizbege engizý týraly Úkimet qaýlysy 2021 jyldyń 14 shildesinde jarıalanǵan bolatyn .