Almatyda sý tasqynyna qarsy qorǵanyshty kúsheıtý boıynsha aýqymdy jumystar júrgizilip jatyr. Joba aıasynda Úlken Almaty, Qarǵaly, Sapojnıkova ózenderi men Qonaev atyndaǵy Úlken Almaty kanalynyń jalpy uzyndyǵy 37,3 km bolatyn tórt sý nysanyn rekonstrýksıalaý jáne abattandyrý júrgizilýde. Sonymen qatar taǵy eki ózenniń 17,5 km ýchaskesinde qurylys-montaj men jobalaý-smetalyq qujattamany ázirleý jumystary bastaldy. Osy sharalardyń maqsaty sý tasqynyna tózimdilikti arttyrý, ózenderdiń ekologıalyq jaǵdaıyn jaqsartý jáne irgeles aýmaqtardy abattandyrý. Jumystar kezeń kezeńimen bekitilgen merzimder men qurylys normalaryna sáıkes júzege asyrylýda.
Aqmola oblysynda sý tasqyny kezeńine daıyndyq boıynsha keshendi jospar aıasynda ınjenerlik is-sharalar belsendi túrde júzege asyrylýda. Qujatta sý tasqyny qaýpin azaıtý jáne eldi mekender men óńirdegi avtojol ýchaskelerin qorǵaýǵa baǵyttalǵan 226 is-shara kózdelgen. Negizgi jumystar sý tasqynynan qorǵaıtyn úıindilerdi turǵyzý jáne nyǵaıtý, arnalar men aryqtardy tazartý, keńeıtý jáne tereńdetý arqyly olardyń ótkizý qabiletin arttyrý, sondaı-aq sý ótkizý qurylystary men kópirlerdi aýystyrý jáne jóndeý sıaqty baǵyttardy qamtıdy. Búgingi tańda oblysta 167 is-shara aıaqtaldy, 37-si belsendi iske asyrylý satysynda, al 22-si boıynsha daıyndyq jumystary júrgizilýde.
Pavlodar oblysynda keshendi is-sharalar jospary men ınjenerlik jumystar jospary bekitildi. Sý basý qaýpin azaıtý maqsatynda uzyndyǵy 30 km qorǵanysh bógenderi men bilikteri nyǵaıtyldy, 2 km sý burý arnalary salyndy jáne jóndeldi, 29 sý ótkizý qubyry ornatylyp, qalpyna keltirildi. TJD qyzmetkerleri sý tasqyny qaýpi bar eldi mekenderge shyǵyp, jaǵdaıdy baqylaýda. Monıtorıń kezinde ushqyshsyz ushý apparattary (drondar) belsendi túrde qoldanylyp, nysandardyń jaǵdaıy jedel tirkelip, atqarylǵan jumystardyń sapasy baqylanady.
Soltústik Qazaqstan oblysynda TJD basshylyǵy oblys ákimimen birlesip Qyzyljar aýdanyndaǵy qorǵanysh bógenderine kóshpeli tekserý júrgizdi. Teplıchnoe jáne Prıbrejnoe aýyldaryndaǵy obektilerge erekshe nazar aýdaryldy, onda bógenderdi nyǵaıtý jáne olardyń sý deńgeıiniń joǵarylaýyna tózimdiligin baǵalaý jumystary júrgizildi. Qosymsha jóndeý jáne qalpyna keltirý is-sharalaryn júrgizýdi talap etetin problemalyq ýchaskelerge erekshe nazar aýdaryldy.
Barlyq jumystar jaýapty mekemeler men qyzmetterdiń qatysýymen josparly túrde júzege asyrylýda. Sý tasqyny kezeńine daıyndyqqa keshendi túrde qaraý óńirlerdegi sý tasqynyna qarsy qorǵanysh deńgeıin aıtarlyqtaı arttyrýǵa múmkindik beredi.