QR Aýyl sharýashylyǵy mınıstri kóktemgi dala jumystary kezinde óńirlerdi aralaý barysynda úsh oblystyń sharýalarymen kezdesti.
18-21 mamyrda Aıdarbek Saparov elimizdiń barlyq egis alqaptarynyń 31,5% -yn quraıtyn úsh aımaqtyń egis jumystarynyń barysymen jáne fermerlerdiń jaǵdaıymen tanysty. Oblys ákimdikteriniń derekteri boıynsha búgingi kúni respýblıka boıynsha 7 mln ga egin egilgen, dep habarlaıdy Almaty-akshamy.kz sala mınıstrligine silteme jasap.
Onyń ishinde Aqtóbe oblysynda - 220 myń ga nemese óńirdiń jalpy egis alqabynyń 37,7%, Qaraǵandy oblysynda - 326,4 myń ga nemese 30,3%, Qostanaı oblysynda - 1 322 myń ga nemese egis úshin josparlanǵan barlyq alqaptyń 25,7%.
QR Prezıdentiniń tapsyrmasy aıasynda mıneraldy tyńaıtqyshtardy engizý deńgeıin arttyrý maqsatynda oblys ákimdikterine bıylǵy jylǵy deńgeıdi qosa alǵanda 1,5 mln tonnaǵa deıin jetkizý mindeti júktelgen. Atap aıtqanda Aqtóbe oblysy - 27,2 myń tonna, Qaraǵandy oblysy - 71,5 myń tonna jáne Qostanaı oblysy - 258,6 myń tonna tyńaıtqyshpen qamtylýy tıis.
21 mamyrdaǵy jaǵdaı boıynsha oblys ákimdikteriniń jedel derekterine sáıkes 889 myń tonna kóleminde tyńaıtqysh satyp alýǵa sharttar jasaldy. Onyń 734,4 myń tonnasy fermerlerge jóneltildi. Búgingi tańda Aqtóbe oblysyna 2,7 myń tonnaǵa kelisim jasalyp, ázirge 2,5 myń tonnasy jiberilgen. Qaraǵandy oblysyna qajetti 28,2 myń tonna tyńaıtqyshqa sharttar jasalyp, 21,2 myń tonnasy atalǵan óńirge jetti. Al, Qostanaı oblysyna qajetti 170,0 myń tonnaǵa kelisimshart jasalyp, 108,7 myń tonna tyńaıtqysh egis alqabyna jetkizildi.
Aıdarbek Saparov jaqsy ónim alý úshin jetkilikti kólemde tyńaıtqysh engizýdiń mańyzdylyǵyn, sondaı-aq bul úshin QR ASHM qajetti jaǵdaı jasaıtynyn, atap aıtqanda tyńaıtqyshtardy avanstyq sýbsıdıalaý tetigi engizilgenin, al qazaqstandyq óndirýshiler tyńaıtqyshtardy ákimdikterdiń kepildigimen jóneltetinin, sonyń arqasynda sharýalarǵa egin egý kezeńinde birden tólem jasaýdyń qajeti joq ekenin atap ótti. Tyńaıtqyshtardy sýbsıdıalaýǵa 2024 jylǵa jergilikti búdjetterden 36,2 mlrd. teńge baǵyttalǵan.
Mınıstr atap ótkendeı, egis jumystaryna 376 myń tonna dızel otyny bólindi, onyń ishinde Qostanaı oblysynda - 79,6 myń tonna, Aqtóbe oblysynda - 7,2 myń tonna, Qaraǵandy oblysynda - 17,4 myń tonna tıesili. Aımaqtyq operatorlardyń jetkizý shyǵyndaryn eskere otyryp, ASHTÓ úshin ortasha baǵa respýblıka boıynsha endi 250 teńge/lıtrdi quraıdy, bul naryqtyq baǵadan 15% arzan.
Sondaı-aq, egis naýqanyn qarjylandyrýǵa alǵash ret 5 paıyzdyq jeńildikpen 580 mıllıard teńgege deıin qaryz qarajat bólindi. «Keń dala», «Keń dala-2» baǵdarlamalary boıynsha Agrarlyq nesıe korporasıasy arqyly jáne forvardtyq satyp alý baǵdarlamasy boıynsha «Azyq-túlik kelisim shart korporasıasy» arqyly qarjy bólindi.
Joǵaryda atalǵan úsh oblystyń sharýalarynan ANK arqyly qarjylandyrýǵa jalpy somasy 49,8 mlrd teńgege 669 ótinim, al Azyq-túlik korporasıasy arqyly 177 myń tonna astyq satyp alý maqsatynda 11,9 mlrd teńgege 134 ótinim túsken.
Aıdarbek Saparov úıir shegirtkeleriniń taralýy boljanatyn Qostanaı jáne Aqtóbe oblystarynda zıankespen kúresý sharalary boıynsha jedel keńester ótkizip, Agroónerkásiptik keshendegi memlekettik ınspeksıa komıtetine ákimdiktermen ózara is-qımyldy qamtamasyz etýdi, sondaı-aq shekara mańyndaǵy aýmaqtar boıynsha jumys júrgizýdi tapsyrdy. Qostanaı jáne Aqtóbe oblystarynda qystaıtyn shegirtke úıirleriniń jaı-kúıin anyqtaý boıynsha monıtorıń jumystary aıaqtaldy, jumyrtqadan shyqqan dernásilderge kóktemgi monıtorıń jumystary bastaldy, Aqtóbe jáne Qostanaı oblystarynda mamyr aıynyń aıaǵynda shegirtkege qarsy jappaı is-sharalar bastalady.