1993 jyly alǵashqy teńge partıasy Anglıanyń eń kóne ári áıgili «Harrıson jáne uldary» fabrıkasynda basyldy
1993 jylǵy 15 qarashada Qazaqstan Respýblıkasynyń ulttyq valútasy – teńge aınalymǵa engizildi. Al 1997 jyldan beri Memleket basshysynyń Jarlyǵymen 15 qarasha – tól valútamyzdyń týǵan kúni ári qarjygerler kúni retinde atalyp ótedi, dep habarlaıdy Almaty-akshamy.kz QazAqparatqa silteme jasap.
Tól valútamyzdyń tarıhyna kóz júgirtsek, 1992 jyldyń 27 tamyzy kúni Ulttyq bank teńge kýpúrasynyń úlgilerin bekitken bolatyn. Qazaq valútasyn ómirge keltirgen sýretshiler Tımýr Súleımenov, Meńdibaı Alın, Aǵymsaly Dúzelhanov, Qaırolla Ábjálelovter eń alǵashqy teńgemizde belgili tarıhı tulǵalardyń portretteri, Alataý men Kókshetaý kórinisteri, Qoja Ahmet Iassaýı kesenesiniń beınesi, Mańǵystaýdan tabylǵan tastaǵy tańbalar paıdalandy. Bir teńgelik banknotqa Ábý Nasyr ál-Farabı, úsh teńgelikte Súıinbaı, bes teńgelikte Qurmanǵazy, on teńgelikte Shoqan, jıyrma teńgelikte Abaı, elý teńgelikte Ábilqaıyr han, júz teńgelikte Abylaı han beınesi somdaldy.
1993 jyly alǵashqy teńge partıasy Anglıanyń eń kóne ári áıgili «Harrıson jáne uldary» fabrıkasynda basyldy. Teńgeni elge tasymaldaý úshin tórt IL-86 ushaqtary Tumandy Albıon eline 18 márte qatynady. Tól valútamyzdyń alǵashqy partıalaryn saqtaý úshin arnaıy jerasty qoımalary daıyndalyp, dál osy qoımalardan ulttyq teńgemiz elimizdiń barlyq óńirlerindegi bankterge 8 kún ishinde jetkizilgen edi.
1993 jyldyń 15 qarashasynda Táýelsiz Qazaqstan Respýblıkasynyń tól valútasy aınalymǵa endi. Eski aqshany qazaqstandyq teńgege aıyrbastaý 1993 jyly 15 qarashada saǵat 8.00-de bastalyp, 20 qarashada saǵat 20.00-de aıaqtaldy.
Qazir banknot - Ulttyq banktiń Almaty qalasyndaǵy Banknot fabrıkasynda, al moneta - Óskemendegi Moneta saraıynda shyǵarylady.