Iordanıa astanasy Amman qalasynda bokstan ótip jatqan Azıa chempıonatynda búgin erler arasynda 9 qazaqstandyq altyn júldege talasady, dep habarlaıdy Almaty-akshamy.kz Inform.kz-ke silteme jasap.
Astana ýaqytymen saǵat 16.00-de bastalatyn qurlyqtyq dodada tórt qazaqstandyq boksshy fınalda birinen keıin biri shyǵady.
Aldymen jastar arasyndaǵy álem chempıony Sanjar Táshkenbaı (48 kg) japonıalyq Aratake Kadzýmamen myqtyny anyqtaıdy.
Budan keıin Tokıo olımpıadasynyń qola júldegeri, álem chempıony Sáken Bıbosynovqa (51 kg) kezek tımek. Ol ózbekstandyqtar úlken úmit artyp otyrǵan olımpıada chempıony Hasanboı Dýsmatovpen altyndy sarapqa salady. 2021 jyly Belgradta ótken álem chempıonatynda H.Dýsmatovtyń Sákennen jeńilip qalǵany belgili. Endi sonyń esesin qaıtarýǵa umtylatyny anyq.
Álem chempıonatynyń kúmis júldegeri Mahmýd Sabyrhan (54 kg) Tokıo olımpıadasynyń fınalısi, fılıppındik Karlo Paalamǵa qarsy turmaq.
Álem chempıonatynyń kúmis júldegerleri, qazaqstandyq Serik Temirjanov (57 kg) pen ózbekstandyq Abdýmalık Halokovtyń jekpe-jegi de qyzý ótetini anyq.
Sondaı-aq jetinshi jupta Dýlat Bekbaýov (67 kg) taılandtyq Býndjong Sınsırımen, ulttyq qurama kapıtany, Azıa oıyndarynyń kúmis júldegeri Aslanbek Shymbergenov (71 kg) ıordanıalyq Zeıad Ishaıshpen, Nurqanat Raıys (75 kg) ózbekstandyq Saıdjamshıd Djafarovpen qolǵap túıistiredi.
Jasóspirimder olımpıadasynyń chempıony, jastar arasynda álem chempıonatynyń kúmis júldegeri Aıbek Oralbaıdyń (92 kg) 12-jupta ózbekstandyq qazaq, 2021 jylǵy dúnıejúzilik dodada qola alǵan Madıar Saıdrahımovpen kezdesýi el nazaryn aýdaratyny anyq.
Boks keshin asa aýyr salmaqta Tokıo olımpıadasynyń qola, álem chempıonatynyń eki márte kúmis júldegeri Qamshybek Qońqabaev túıindeıdi. Onyń qarsylasy – taǵy bir ózbekstandyq Lazızbek Mýllajonov.
Fınalǵa Qazaqstannan 9, Ózbekstannan 7 boksshy shyqsa, solardyń beseýi ózara judyryqtasady.
Sondaı-aq Iordanıadan 4, Taılandtan 2, Úndistan, Japonıa, Fılıppın men Mońǵolıadan bir-birden sportshy altyn úshin saıysqa túsedi.