Búgin – Memlekettik rámizder kúni. Bıyl memlekettigimizdiń sımvoldarynyń qabyldanǵanyna 32 jyl toldy, dep habarlaıdy almaty-akshamy.kz.
1992 jyldyń basynda memlekettik úsh nyshan – Tý, Eltańba jáne Ánuranymyzdy tańdaý úshin Joǵarǵy keńes prezıdıýmy jumys tobyn quryp, arnaýly shyǵarmashylyq komısıa taǵaıyndady. Onyń quramyna Salyq Zımanov, Erbol Sháımerdenov, Serikbolsyn Ábdildın, Serik Ábdrahmanov jáne taǵy basqa qaıratkerler kirdi. Osydan keıin búkil Qazaqstan kóleminde Eltańba, Tý, Ánuran nusqalaryna konkýrs jarıalandy.
Bir ǵana týdyń ózine 600 adamnan 1 200 nusqa tússe, Eltańbanyń 245 jobasy, ánurannyń 750 úlgisi baıqaýǵa qatysty.
Estetıkalyq sıpatymen de, tarıhı, saıası, ekonomıkalyq sımvolızmge sáıkes kelýi boıynsha da úzdik týyndy usynǵan baıqaý jeńimpazdaryn qazir halyq memlekettik nyshan avtorlary retinde tanıdy.
Olar: Tý avtory - Sháken Nıazbekov. Eltańba avtorlary - Jandarbek Málibekov pen Shota Ýálıhanov.
Sonymen qatar Táýelsiz Qazaqstannyń tuńǵysh ánuran avtorlary retinde - áýenin jazǵan Muqan Tólebaev, Evgenıı Brýsılovskıı men Latıf Hamıdıdiń esimi tarıhta qaldy. Úzdik mátinge jarıalanǵan baıqaýda Muzafar Álimbaev, Qadyr Myrzalıev, Tumanbaı Moldaǵalıev jáne Jadyra Dáribaeva jeńip shyqty. Keıin, ıaǵnı, 2006 jyly jańa memlekettik gımn qabyldandy. Tańdaý el arasynda keńinen tanymal «Meniń Qazaqstanym» ánine túsken edi.
1956 jyly sazger Shámshi Qaldaıaqov pen Jumeken Nájimedenovtiń shyǵarmashylyq tandeminen shyqqan týyndynyń bastapqy mátinin Nursultan Nazarbaev óńdedi.
2006 jyly 6 qańtarda Qazaqstan Parlamenti jańa memlekettik gımnin bekitti. Birinshi ret ol 2006 jyly 11 qańtarda Memleket basshysynyń saltanatty ulyqtaý rásiminde oryndaldy.
2007 jyly 4 maýsymda qabyldan «Qazaqstan Respýblıkasynyń Memlekettik rámizderi týraly» Konstıtýsıalyq Zańǵa sáıkes jyl saıyn 4 maýsym Qazaqstan Respýblıkasynda Memlekettik rámizder kúni retinde merekelenedi.