Jurt bir-birine aq tilegin arnaıdy
Búgin qazaq halqynyń kóneden kele jatqan dástúrli merekesi - Kórisý kúni, dep habarlaıdy Almaty-akshamy.kz.
Ulystyń uly kúni Naýryz merekesiniń aýqymyn keńeıtý úshin tól jańa jyldy kún men tún teńelerden 10 kún buryn bastaý ádetke aınalyp keledi. On kúndik dýmandy mazmundy etý aıasynda Kórisý kúni resmı sharalardyń qataryna qosylyp, búginde búkil qazaq biletin aıtýly kúnge aınalyp otyr, dep jazdy QazAqparat.
Bir kúnniń aıasymen shektelip qalmaı, jyl boıy jalǵasa beretin Kórisý salty negizinen Batys Qazaqstan, Atyraý oblystarynda jáne Aqtóbeniń keıbir aýdandarynda, Reseıdiń kórshiles Astrahan, Saratov, Orynbor óńirlerinde, Qaraqalpaqstanda atalyp ótedi. Al Mańǵystaý óńiriniń jurty ony Amal merekesi dep te ataıdy.
Ejelden kele jatqan ata saltymyz boıynsha jastar osy kúni úlkenderge sálem berip, batasyn alady. Jurt bir-birine aq tilegin arnaıdy.
Amal merekesin Naýryzdan bóle-jara qaraýǵa bolmaıdy. Ol - Naýryzdyń alǵashqy jarshysy ispettes. Amaldyń negizgi sharty - úlkendi syılaý, kishige qamqorlyq kórsetý, álsizdi demeý, jarlyny jarylqaý. Bul kúni jasy kishiler úlkenderge arnaıy sálem berip, qol alysyp, tós qaǵystyrady. Aqsaqaldar «Bir jasyń qutty bolsyn!» dep, jastarǵa batasyn beredi. Burynǵy ókpe-renish keshirilip, arazdyq umytylady. Úı ıeleri kelgenderge dám usynyp, aq tilegin jaýdyrady. Osylaısha, Kórisý - baýyrmaldyqtyń, kishipeıildiktiń, qaıyrymdylyqtyń merekesi sanalady.