Qoshtasýǵa qazaqtyń barlyq ıgi jaqsysy, barlyq salanyń ókilderi jáne Murat Muhtarulyna tileýles bolǵan qarapaıym turǵyndar da kóp jınaldy.
Búgin Qurban aıtta qazaq eli asyldyń synyǵy, tulpardyń tuıaǵy, ultqa ómiriniń sońyna deıin adal qyzmet etken tulǵa, kórnekti memleket jáne qoǵam qaıratkeri, mádenıettanýshy, shyǵystanýshy ǵalym, I dárejeli "Barys" ordeniniń ıegeri, dıplomat Murat Muhtaruly Áýezovti sońǵy saparyna shyǵaryp saldy, dep habarlaıdy Almaty-akshamy.kz
Marqummen qoshtasý rásimi Almatydaǵy Muhtar Áýezov atyndaǵy Qazaq Ulttyq drama teatrynda ótti. Janazasy da sol jerde shyǵaryldy.
Qaraly jıynda Memleket basshysy Qasym-Jomart Kemeluly Toqaevtyń kóńil aıtý haty oqyldy.
"Ult rýhanıatynyń alǵa basýyna, qazaq ǵylymynyń kókjıegin keńeıtýge bar sanaly ǵumyryn arnaǵan zıaly, parasatty tulǵa edi. Qazaq ádebıeti men mádenıetin, tarıhyn tereń zerdelep, sońyna ólsheýsiz mol mura qaldyrdy. Qazaqstannyń halyqaralyq dárejedegi bedeliniń artýyna óziniń saıası-qoǵamdyq isterimen zor úles qosty. Ǵıbratty ǵumyr keship, kemel de kemeńger áke jolyn laıyqty jalǵaǵan Murat Muhtarulynyń jarqyn beınesi men qadirli esimi halqymyzdyń júreginde máńgi saqtalady. Marqumnyń ımany salamat, jany jánnatta bolsyn," – dep jazylǵan kóńil aıtý hatynda.
Qoshtasý rásiminde, sondaı-aq QR Premer-mınıstri Oljas Bektenovtiń, Senat spıkeri Máýlen Áshimbaevtiń kóńil aıtý hattary oqyldy. Sóz sóılegenderdiń ishinde belgili memleket jáne qoǵam qaıratkeri Muhtar Qul-Muhammed, Qazaqstan Jazýshylar odaǵynyń tóraǵasy Mereke Qulkenov jáne t.b. zıaly qaýym ókilderi boldy. Muhtar Áýezovteı kemeńger ákeniń jolyn laıyqty jalǵaı bilgen Murat Muhtarulynyń atyna jaqsy sózder aıtyldy.
Marqum Almatynyń ortalyǵyndaǵy Raıymbek dańǵyly boıyndaǵy zıratta jatqan ákesi Muhtar Áýezovtiń qasyna jerlendi.