Qalamger 1952 jyly M.Gorkıı atyndaǵy Ádebıet ınstıtýtyn tamamdaǵan soń Qazaq radıosynda istegen. Abaı atyndaǵy akademıalyq opera jáne balet teatrynyń ádebıet bólimin basqarǵan, Qostanaı oblystyq gazetiniń menshikti tilshisi, mádenıet bóliminiń meńgerýshisi bolǵan.
Muhamedjan Dúzenovtiń alǵashqy óleńderi men áńgimeleri 1949 jyldan baspa betinde jaryq kóre bastady. Birneshe poves, roman kitaptary, dramalyq shyǵarmalary dúnıege keldi. Bir aktili pesalar konkýrsynda «Araldyń altyn balyǵy» atty týyndysy ekinshi báıge aldy. Budan bólek qalamger V.Vasılevskaıanyń «Plamá na bolotah» romanyn, S.Marshaktyń «Ýmnye veshı» pesasy, L.Kassıldiń «Hod beloı korolevy» týyndysyn qazaqshaǵa aýdarǵan.