Elena Rybakınanyń qarsylasy álemniń besinshi raketkasy - Arına Sobolenko.
Búgin Aýstralıa ashyq birinshiliginiń fınalynda qazaqstandyq Elena Rybakına men álemniń 5-raketkasy, Belarýs ókili Arına Sobolenko chempıondyq ataqty sarapqa salady, dep habarlaıdy Almaty-akshamy.kz QazAqparatqa silteme jasap.
Qos tenısshi de Aýstralıa ashyq chempıonatynyń fınalyna alǵash ret shyǵyp otyr.
Buǵan deıin 23 jastaǵy Elena Rybakına 2020 jyly úshinshi aınalymǵa deıin jetken edi. Al odan bir jasqa úlken Arına Sobolenko tórtinshi aınalymnan asyp kórgen emes.
E.Rybakınanyń ótken jyly Ýımbldon týrnıriniń chempıony atanǵany belgili. A.Sobolenko 2021 jyly Ýımbldon men US Open, 2022 jyly US Open dodasynda jartylaı fınalǵa deıin jetken. Bul onyń «Úlken dýlyǵa» týrnırindegi alǵashqy fınaly bolmaq.
Qarsylastar ózara úsh ret kezdesip, bárinde de belarýstik tenısshi úsh sette basym túsken.
Fınaldyq mach senbi kúni Astana ýaqytymen saǵat 14.30-da bastalady.
Aýstralıa ashyq chempıonatynyń jalpy júlde qory 51,3 mln AQSH dollarynan asady.