Búgin - 12 qańtar memleket jáne qoǵam qaıratkeri Dinmuhamed Qonaevtyń týǵanyna 113 jyl toldy. Óz dáýiriniń uly saıasatkeri bola bilgen birtýar tulǵa kúrdeli, qarama-qaıshylyqqa toly kezeńge qaramastan, eldiń ekonomıkasyn, áleýmettik salasyn, ǵylymyn, tól mádenıetin damytý isine aıtýly eńbek sińirdi, dep habarlaıdy aqshamnews.kz
Dinmuhamed Ahmetulynyń týysy, halyqaralyq «Qonaev qorynyń» prezıdenti Eldar Qonaev sońǵy 2-3 jyl áýleti úshin qýanyshty jańalyqtarǵa toly bolǵanyn aıtady. Onyń sózinshe, birneshe óńirde «Qonaevtaný» páni fakúltatıv retinde engizilgen.
Eldar Qonaev, Halyqaralyq «Qonaev qorynyń» prezıdenti:
Dımash Ahmetulynyń bar armany – elimizdiń Táýelsizdik alyp, óz aldyna derbes bolýy edi. Búginde memlekettiń, halyqtyń qaıratkerge degen yqylasy zor. Máselen, Almaty jáne Jambyl oblystarynda eńseli eskertkishter boı kóterdi. Shymkent, Atyraý jáne Aqtóbe qalalarynda ashylǵan zamanaýı mektepterge Dımash Ahmetulynyń esimi berildi. Qazir Qonaev qalasy bar. Bul uly tulǵaǵa degen qurmettiń belgisi ekeni anyq.
Qýan Nuraqyn, tilshi:
Dinmuhamed Ahmetulynyń múzeı úıi men mýzeıinde 8 myńnan asa eksponat saqtaýly. Sonyń ishinde Dımash Ahmetuly myna jádigerdi erekshe jaqsy kórgen eken. Bul qobdıshany 70 jyldyq mereıtoıynda Oqýshylar saraıynyń oqýshylary syıǵa tartqan eken.
Bul jumys Dımash Ahmetulyna qarapaıymdylyǵymen unapty. Mýzeıge kelýshilerdi birtýar tulǵanyń eńbekqorlyǵy tańqaldyrǵan.
Ańyz tulǵanyń Almatydaǵy turǵan úıi men mýzeıine kelýshiler sany jyl saıyn artyp keledi. 2023 jyly 20 myń adam aıaq bassa, 2024 jyly 40 myńnan asqan.
Elena Kýbasheva, D.Qonaev mýzeıiniń jetekshisi:
Dinmuhamed atamyz basshylyqta 45 jyldaı bolǵan. Sonyń 25 jyly Qazaqstandy basqarǵan eken. Qazaqstandy da ekonomıkamyz kóterilgen eken. 8,9%. Kartaǵa qarasaq 55 jyldary qandaı boldy ekonomıkamyz 86 jyldary qandaı boldy. Mysaly, 2 myńnan asa kolhoz, sovhoz kóbeıgen eken. 43 qala qalanǵan eken sol ýaqytta.
Qoryta aıtqanda, HH ǵasyrdyń ekinshi jartysynda qazaqtyń ulttyq sanasynyń ósýine, eńsesi kóterilip, ult retinde uıysýyna Dinmuhamed Qonaevtyń eńbegi eren. Ol árdaıym el múddesin, bolashaq qamyn bir sát esten shyǵarǵan joq. Sodan bolar, tutas jurt qaıratkerdi naǵyz ult janashyry, kemeńger basshy retinde tanydy, deıdi mýzeı qyzmetkerleri.