2024 jyldyń basynda respýblıka jastarynyń sany - 5 759 781 adam. Bul 14 pen 35 jas aralyǵyndaǵy qazaqstandyqtar.
Jyl basynan beri 20 myńnan astam jastar kásibı baǵdar berý jumystarymen qamtyldy, 130 myńnan astamy jastardy qoldaýǵa baǵyttalǵan memlekettik baǵdarlamalar men bastamalardyń baǵyttary boıynsha konsýltasıalyq kómek aldy, dep habarlaıdy aqshamnews.kz QR Mádenıet jáne aqparat mınıstrliginiń baspasóz qyzmetine silteme jasap.
Memleket basshysy Q. Toqaevtyń tapsyrmasy boıynsha Qazaqstan Respýblıkasynyń 2023-2029 jyldarǵa arnalǵan memlekettik jastar saıasatynyń tujyrymdamasyna tıisti ózgerister men tolyqtyrýlar engizý boıynsha jumys júrgizilýde.
Turǵyn úı máselelerin sheshý úshin aǵymdaǵy jylǵy naýryz aıynda Otbasy bankimen birlesip, aýdıtorıasynyń 60% - y jastardy qamtyǵan «9-20-25/Otaý» jańa ıpotekalyq baǵdarlama iske qosyldy. 1 mamyrdaǵy jaǵdaı boıynsha jas otbasylardan 16 747 ótinish berildi.
Sonymen qatar 18 jastan 35 jasqa deıingi jumys isteıtin jastar úshin elimizdiń 16 óńirinde jyldyq kredıt boıynsha paıyzdyq mólsherlemesi 5% , bastapqy jarnasy 10% jáne 25 jylǵa deıingi merzimi berilgen jeńildetilgen turǵyn úı baǵdarlamalary iske asyrylýda.
«Jumys istep júrgen jastarǵa satyp alý quqyǵynsyz jalǵa beriletin turǵynjaı berý qaǵıdalaryn bekitý týraly» buıryqqa ózgerister engizildi. Qaǵıdada jumys isteıtin jastar úshin satyp alý quqyǵynsyz jalǵa beriletin turǵyn úı alý úshin jyl saıynǵy jınaqtaý shegin engizý kózdeledi.
Shyǵarmashylyq jáne belsendi jastardy qoldaýǵa qatysty «Daryn» Memlekettik syılyǵynyń qaǵıdalaryna tolyqtyrýlar engizildi. Birinshiden, syılyqaqy mólsheri 600 myń teńgeden 1 mıllıon teńgege deıin ulǵaıtyldy. Ekinshiden, «Qoǵamdyq qyzmet» jańa nomınasıasy qosyldy.
Jastar saıasatynyń negizgi baǵyttary: jumyssyzdyq, turǵyn úı máselelerin sheshý, bıznes-bastamalardy qoldaý, sondaı-aq bilim men mádenıet deńgeıin kóterý.
«Zhas project» jobasy aıasynda bıyl aýyl jastary arasynda 280 grant bólinip, bıznes-jobalaryn iske asyrý úshin NEET sanaty iske asyrylýda.
Jastardyń bıznes-bastamalaryn qoldaý úshin «Táýelsizdik urpaqtary» jobasyn iske asyrý jalǵasýda. 2024 jyly 3 mln teńge kóleminde 30 grant bólý kózdelgen. Volonterlik salany qoldaý maqsatynda qosymsha «Volonterlik» baǵyty qarastyrylǵan.