QR Konstıtýsıalyq Soty «Neke (erli-zaıyptylyq) jáne otbasy týraly» kodekstiń 91-baby 2-tarmaǵynyń 11) tarmaqshasyn Konstıtýsıaǵa sáıkes emes dep tanydy.
Kodekstiń atalǵan normasyna sáıkes, anasynyń qaıtys bolýyna nemese onyń ata-ana quqyqtarynan aıyrylýyna baılanysty balanyń keminde úsh jyl is júzinde tárbıelený jaǵdaılaryn qospaǵanda, tirkelgen nekede turmaǵan (erli-zaıypty bolmaǵan) erkek jynysty adamdar bala asyrap ala almaıdy.
Konstıtýsıalyq Sotqa júgingen azamat bul normany kemsitýshi jáne Konstıtýsıanyń eshkimdi jynysy boıynsha qandaı da bir kemsitýge bolmaıdy dep kórsetilgen 14-babyna qaıshy dep sanaıdy. Ol tirkelgen (zańdy) nekede turmaǵan áıelder úshin mundaı tyıym salý joq ekenine nazar aýdarady.
Tekserý nátıjeleri boıynsha Konstıtýsıalyq Sot tutastaı alǵanda zań shyǵarýshynyń bala asyrap alý quqyǵynyń sharttary men shekteýlerin belgileý jónindegi tásiliniń ózi memlekettiń balalyq shaqty qorǵaýdyń konstıtýsıalyq belgilengen mindetine jáne balalardyń múddelerin barynsha jaqsy qamtamasyz etýdiń qabyldanǵan mindettemelerine sáıkes keletindigin, sondaı-aq, belgili bir maqsattarda adam men azamattyń quqyqtary men bostandyqtaryn zańdarmen shekteý múmkindigi týraly Konstıtýsıanyń 39-babyna sáıkes keletindigin atap ótti.
Sonymen birge, bala asyrap alǵysy keletin adamdar úshin zań shyǵarýshy belgilegen shekteýler zańdy túrde negizdelgen maqsattarǵa sáıkes kelýi jáne balalardyń quqyqtary men múddelerine súıene otyryp, ádildik, proporsıonaldylyq jáne mólsherlestik talaptaryna saı jaýap berýi kerek.
Konstıtýsıalyq Sot óz quqyqtary men múddelerin qorǵaýǵa muqtaj balanyń múddelerine súıenip, neke men otbasyn, ana bolýdy, áke bolýdy jáne balalyq shaqty qorǵaýdyń konstıtýsıalyq belgilengen mindetin basshylyqqa alý kerektigin kórsetti. Tıisinshe, zańnamalyq tetikter bala men áıeldiń, eń aldymen, nekede turǵan jáne otbasy bar, balanyń múddeleri men qamqorlyǵyn jaqsy qamtamasyz etý maqsattaryna kóbirek jaýap beretin adam retinde bala asyrap alýdy qoldaýǵa baǵyttalýy kerek.
Osylaısha, balalardy asyrap alýǵa nıet bildirgen adamdarǵa degen teń emes kózqaras Konstıtýsıanyń 14-babynyń talaptaryna sáıkes kelmeıdi dep tabyldy.