Ózbekstan parlamentiniń zań shyǵarýshy (tómengi) palatasynyń otbasy jáne áıelder isteri jónindegi komıteti týystar arasyndaǵy nekege tyıym salýdy keńeıtýdi kózdeıtin otbasy kodeksine ózgerister engizý týraly zań jobasyn jarıalady.
Bul jaıynda islam.kz portaly TASS aqparat agenttigine silteme jasaı otyryp málim etedi, dep habarlaıdy almaty-akshamy.kz.
Parlamenttiń tómengi palatasynyń baspasóz qyzmeti habarlaǵandaı, tolyqqandy, ıaǵnı, bir atadan taraǵan jaqyn týysqandarmen neke qıýǵa salynǵan tyıymmen qatar, ekinshi, úshinshi jáne tórtinshi dárejedegi jaqyn týystar arasynda da otaý qurýǵa tyıym salynýy múmkin. Bul arada aǵa-inileri men ápke-qaryndastary, olardyń balalary, áke men shesheniń ini-qaryndastary, olardyń balalary, ata-ájesiniń aǵa-ápkeleri, olardyń balalary, t.b. arasynda shańyraq kóterýge salynatyn tyıym týrasynda sóz bolyp otyr. Ózbekstanda 2021 jyldan bastap tikeleı týysatyn týystar arasyndaǵy, sondaı-aq, asyrap alýshylardyń balalary men asyrap alynǵan balalar arasyndaǵy nekege ruqsat etilmeıdi.
Eger medısınalyq-genetıkalyq taldaý (DNQ synaǵy) nátıjesi oń nátıje berse, nekege ruqsat etiledi. Sonymen qatar, nekege turǵanǵa deıin medısınalyq tekserýden ótý tártibin buzǵany úshin, ıaǵnı, nekelespen turyp medısınalyq tekserýden ótpegender jaýapkershilikke tartylýy múmkin. Ózbekstanda jaqyn týystary qurǵan otbasynda kemistigi bar kemtar balalar men tuqym qýalaıtyn aýrýy bar balalar sany artyp ketken. Atap aıtqanda, osy jyldyń aınaldyrǵan bes aıynda respýblıkalyq pedıatrıalyq ortalyqtyń bólimshelerine aýyr tuqym qýalaıtyn aýrýmen 6660 bala jatqyzyldy; bul balalardyń ata-anasynyń 28,9 paıyzy bir-birine jaqyn týys. Túrli derek kózderine súıensek, Ózbekstanda aýyldyq jerlerdegi nekelerdiń tórtten birine deıin týysqan otbasylar arasynda qıylǵan, al qalalyq jerlerde árbir 10-shy erli-zaıyptylardyń arasynda týystyq qatynas bar.