Ekologıa jáne tabıǵı resýrstar mınıstri Erlan Nysanbaev "býaz kıikterdi atyp jatyr" dep másele kótergen azamattarǵa jaýap berdi, dep habarlaıdy almaty-akshamy.kz.
– Qazaqstanda qazir 2,5 mln kıik bar. Tek býaz kıikter jaıly aıttyńyz. Qyrkúıektiń jeltoqsannyń aıaǵyna deıin ańshylyqqa ruqsat etemiz. Qarańyzdarshy: tamyzda qaban tóldeıdi. Qyrkúıekte elik, taýeshki kúıleıdi. Jalpy ańdardyń kóbi qarashanyń ortasynda kúıleıdi. Álemde ańshylyq jasaıtyn merzimde kóp ań kúıleıtin kezeńde bolady. Sol sebepti biz bıologıalyq ǵylymı negizdeme aıasynda jumys istep jatyrmyz, – deıdi Erlan Nysanbaev úkimettiń baspasóz máslıhatynda.
Onyń aıtýynsha, kıikti atý aqpan aıynan bastap toqtatylady.
– Tek kıikti býaz kúıinde atyp jatyr deýge bolmaıdy. Endeshe jalpy ańshylyqty toqtataıyq. Tek kıikti ǵana býaz kezinde atsa bir másele. Men de ondaıǵa barmas edim. 2,5 mln kıik bar. Ósimtal ań bul. Urǵashy laq mamyrda týsa, sol jyldyń jeltoqsanynda, jeti aıynda kúıleıdi. Ósimtal mal. Qanshalyqty teris yqpalyn dıqanshylar kórip otyr. Bıyl mamyrda 40 paıyz tóldeıdi, – deıdi ol.
Ekologıa jáne tabıǵı resýrstar mınıstrliginiń buıryǵyna sáıkes, aqbókenderden basqa, sany retteletin janýarlar tizimine qasqyrlar, shıbóriler, qarǵalar, úlken kormoranttar, jylanbas balyqtar endi. Tizimdegi janýarlardyń sany halyqtyń densaýlyǵyn saqtaý, aýyl sharýashylyǵy jáne basqa úı janýarlarynyń aýrýlarynan qorǵaý, qorshaǵan ortaǵa zıan keltirmeý maqsatynda rettelmek.
Buıryq 2023 jyldyń 6 qazanynan bastap qoldanysqa engen.