Bronhıt - bronhtyń qabynýynan týyndaǵan tynys alý organdarynyń aýrýy.
Bronhıt kezindegi qabyný prosesi bronhtyń shyryshty qabyǵyna ǵana áser etýi ne onyń qabyrǵasynyń búkil qalyńdyǵyna áser etýi ábden múmkin deıdi Almaty No36 qalalyq emhananyń dárigeri Nazym Shójeeva.
Onyń aıtýynsha, jiti bronhıt jótelmen, keýdedegi aýyrsynýmen jáne entigýmen sıpattalady. Bronhıt jaǵdaıynyń kópshiligi ózdiginen joıylsa da, aýrý durys emdelmegende týyndaýy múmkin belgili bir asqynýlar bar.
Máselen jiti bronhıt bronhopnevmonıa túrindegi asqynýdy týdyrýy múmkin, bul ókpege áser etetin ınfeksıalyq jáne qabyný prosesi, qyzba, qurǵaq jótel jáne jalpy álsizdikti týdyrady.
Sozylmaly aýrýdyń baqylanbaıtyn shyrqaýy turaqty jiti pnevmonıaǵa ákeledi jáne aqyrynda ókpeniń obstrýktıvti aýrýyna aınalady. Bul kezde arna tarylyp, tynys alý joldarynyń shyryshty qabaty isinedi, ókpe tinderi ishinara joıylady.
«Aýrýdyń asqynýyna jol bermeý óte mańyzdy. Jótel, qyzba, álsizdik sıaqty múmkin bronhıaldy zaqymdanýdyń alǵashqy belgileri paıda bolǵan kezde-aq dárigerge kóriný kerek. Dáriger dıagnoz qoıyp, qalaı jáne nemen emdeý kerek ekenin aıtady», - dep bólisedi maman.
Sozylmaly bronhıt ókpe gıpertenzıasynyń, emfızemanyń, bronhoektazdyq aýrýdyń, pnevmonıanyń, tótenshe jaǵdaıda júrek jetkiliksizdiginiń jáne basqa da birqatar qaýipti aýrýdyń damýyn týdyrýy múmkin.
Joǵaryda atalǵan asqynýdyń kez kelgenine tap bolsańyz, múmkindiginshe tezirek medısınalyq kómekke júginý mańyzdy. Ýaqtyly emdeý kezinde joǵaryda atalǵan asqynýdyń damý yqtımaldyǵyn aıtarlyqtaı tómendetýge bolady.