Sotty bolǵan jasóspirimder jazasyn ótep jatqan mekemeniń túrli mádenı, ádebı, rýhanı is-sharalar ótetin zaly gúldermen, ashyq tústi sharlarmen, rýhty sózder jazylǵan plakattarmen bezendirilipti. Balalardyń ózi jasaǵan qabyrǵa gazeti de aıtýly kúnniń lebin sezdiredi. Mereke shymyldyǵy elimizdiń Ánuranymen ashyldy.
Kolonıada tárbıelenip jatqan jastar óz kúshterimen konsert qoıdy, soǵys jyldaryndaǵy ánderdi shyrqady, sonaý surapyl jyldary jazylǵan óleńderdi oqydy. Áskerı taqyryptaǵy beıneklıpterdi tamashalady.
İs-shara barysynda bir mınýt únsizdik jarıalanyp, soǵystan qaıtpaı qalǵan atalarǵa qurmet kórsetildi. Ár bala tarıhta qalǵan esimi belgili jaýyngerlerdi atap jatqanda, bir tárbıelenýshi soǵystan oralmaǵan óz atasynyń esimin ataǵany tipti áserli shyqty.
Jasóspirimder sosyn «Jeńis kúni» ánin birge shyrqady.
«Kesh sońynda balalar Uly Otan soǵysynyń alǵashqy aýyr jyldaryndaǵy qaıǵyly oqıǵalardy baıandaıtyn "Brest qamaly" fılmin bir demmen otyryp kórip shyqty. Demek, olarǵa oıly kartına oı saldy dep oılaımyn. Maqsat ta sol, aıaǵyn jaza basyp, isti bolǵan jasóspirimderdi beıbit ómirdiń qadirin bilýge shaqyrý, adamgershilik, qaıyrym, dostyq, Otandy súıý syndy qasıetterdi boıyna sińirý», – deıdi №11 mekemeniń tárbıe isi mamany Erkegúl Jeńisqan.