UQK Qyzylorda oblysy jáne Baıqońyr qalasy boıynsha departamenti kıik múıizin satpaq bolǵan eki azamatty ustady, dep habarlaıdy Almaty-akshamy.kz QR UQK baspasóz qyzmetine silteme jasap.
Memleket basshysynyń brakonerlikke qarsy kúres boıynsha is-sharalardy kúsheıtý jónindegi tapsyrmasyn oryndaý úshin, 2022 jylǵy 15 naýryzda UQK Qyzylorda oblysy jáne Baıqońyr qalasy boıynsha departamenti tyıym salynǵan janýarlar derıvattaryn ótkizý áreketi kezinde eki azamatty qolǵa túsirdi. Prosesýaldyq is-qımyldar barysynda jalpy salmaǵy 160 kg bolatyn 641 dana kıik múıizi alyndy.
Oblystyq Orman sharýashylyǵy jáne janýarlar dúnıesi ınspeksıasynyń derekteri boıynsha qylmystyq áreketten memleketke zalal 1,5 mlrd teńgege baǵalanyp otyr.
Kúdiktilerge qatysty sot qamaýda ustaý túrindegi bultartpaý sharasyn sanksıalady. Sotqa deıingi tergeý júrgizilýde.