Almatyda N.Daýletova atyndaǵy QR Ulttyq kitaphanasynyń zalynda belgili mádenıet qaıratkeri, fılosofıa ǵylymdarynyń kandıdaty, «Shalqar» radıosynyń bas redaktory Bolatbek Tólepbergenniń jańa kitaptarynyń tusaýkeseri ótti.
İs-sharaǵa zıaly qaýym ókilderi, jýrnalıser, jazýshylar jáne oqyrmandar jınaldy, dep habarlaıdy aqshamnews.kz.
Prezentasıada Bolatbek Tólepbergenniń bıyl jaryq kórgen bes jańa kitaby tanystyryldy. Sonyń ishinde «Alań jurt» atty derekti hıkaıaty erekshe qyzyǵýshylyq týǵyzdy. Bul shyǵarmada 1970 jyldary Keńes júıesi tarapynan ádiletsiz aıyptaýǵa ushyraǵan dıssıdent Azamat Jakıbaevtyń ómiri sýrettelgen. Avtor tarıhı taqyrypty kórkem tilmen jetkize otyryp, oqyrmanǵa oı salarlyq tyń týyndy usynǵan.
Sonymen qatar, Bolatbek Tólepbergenniń «Ulttyq ıdeıa – ulttyq medıanyń tuǵyry» atty monografıasy kópshiliktiń nazaryna usynyldy. Bul eńbekte qazaq ulttyq ıdeıasynyń qalyptasýy men damýy medıa salasynyń negizgi tiregi retinde taldanǵan. Avtor ulttyq sananyń mańyzdylyǵyn atap ótip, ulttyq ıdeıanyń rólin aıqyndaı túsýdi maqsat etken.
Tusaýkeserde kópshilik nazaryna usynylǵan taǵy bir eńbek – «Turaqty damý maqsattary aıasyndaǵy jýrnalısıka jáne baspa isi: dástúr men jańashyldyq» atty konferensıa materıaldary boldy. Bul jınaq avtordyń 50 jyldyq mereıtoıyna oraı uıymdastyrylǵan ǵylymı-tájirıbelik konferensıa materıaldaryn qamtyǵan.
Sondaı-aq, «Ulttyq medıa – ulttyq qaýipsizdik» atty pýblısısıkalyq kitap tanystyryldy. Munda qazaq baspasóziniń Alash kezeńinen bastap búgingi kúnge deıingi tarıhy men damý joly qarastyrylyp, táýelsizdik kezeńindegi qoǵamdyq-saıası oqıǵalardyń medıaǵa yqpaly taldanǵan.
Kitap kórmesinde «Bolatbek Tólepbergen: bıblıografıalyq kórsetkishi» atty eńbegi de oqyrmanǵa usynyldy. Bul jınaqta avtordyń búginge deıingi jaryq kórgen eńbekteri hronologıalyq tártipte júıelengen. Kórsetkishtiń alǵy sózin tarıh ǵylymdarynyń doktory, profesor Mámbet Qoıgeldıev jazyp, avtordyń shyǵarmashylyǵy men ǵylymǵa qosqan úlesin atap ótken.
Prezentasıada Bolatbek Tólepbergen óziniń eńbekteriniń basty maqsatyn, ulttyq qundylyqtar men mádenıetti qoldaýǵa baǵyttalǵanyn atap ótti. Jınalǵan qaýym avtordyń shyǵarmashylyǵy men onyń mádenıetke, ulttyq sanaǵa qosqan úlesin joǵary baǵalady.