Ol ózine qyzmette bolǵan kezde berilgen memlekettik nagradasynan aıyrylady.
Astananyń mádenıet basqarmasynyń eks-basshysy Bolat Majaǵulovqa sot úkimi shyqty, dep habarlaıdy aqshamnews.kz
Astana qalasynyń qylmystyq ister jónindegi aýdanaralyq sotynyń sýdıasy Ásel Muqyshevanyń úkimi boıynsha Bolat Majaǵulov taǵylǵan aıyptar boıynsha kináli dep tanylyp, 8 jyl 6 aıǵa sottaldy.
Bolat Majaǵulov ótken jyldyń qyrkúıek aıynyń basynda ustaldy. Tergeýdi QMA (Qarjy monıtorıńi agenttigi) júrgizdi. Eks-sheneýnikke QR QK 189-babynyń 4-bóligi, 2-tarmaǵy boıynsha («Senip tapsyrylǵan bóten múlikti ıemdený nemese ysyrap etý») aıyp taǵyldy. Tergeý nusqasy boıynsha, «Solnse» sýburqaǵyn salý kezinde bir mıllıardtan astam teńge jymqyrylǵan.
2016 jyly elordanyń týǵan kúnine oraı paıdalanýǵa berilgen «Solnse» sýburqaǵy Ortalyq Azıadaǵy eń aýqymdy joba retinde tanystyrylǵan edi. 80 metrge deıin kóteriletin sý aǵyndary jarqyn shoý jasap, elorda turǵyndary men qonaqtaryn qýantty. Alaıda 2019 jylǵa qaraı sýburqaq jaramsyz bolyp, sý aǵyndaryn búrkýin toqtatty. QMA málimdeýinshe, sýburqaq qurylysynda sapasyz materıaldar paıdalanylyp, memlekettik satyp alý rásimderin ótkizbesten kelisimsharttarǵa qol qoıylǵan.