Osy jyly magıstratýra men rezıdentýraǵa 385, doktorantýraǵa 60 stıpendıa bólindi.
QR Bilim jáne ǵylym mınıstrliginiń baspasóz qyzmetiniń málimetinshe, 23 mamyrda «Bolashaq» halyqaralyq baǵdarlamasy boıynsha jetekshi sheteldik joǵary oqý oryndaryna túsý úshin qujat qabyldaý bastalady, dep habarlaıdy Almaty-akshamy.kz
Konkýrstyq irikteý 2022 jylǵy 30 mamyr men 30 qarasha aralyǵynda ótedi.
Ótinishter 2022 jylǵy 14 qazanǵa deıin Egov.kz memlekettik qyzmetter portaly arqyly qabyldanady. Bıyl taǵylymdamadan ótýge qujattardy qabyldaý 2022 jylǵy 5 qyrkúıekte bastalyp, 14 qazanǵa deıin jalǵasady.
«Memleket basshysynyń tapsyrmasymen «Bolashaq» baǵdarlamasyn qaıta baǵdarlaý prosesi iske qosyldy. Injenerlik-tehnıkalyq kadrlardy daıarlaýǵa basty nazar aýdarylady. Osyǵan baılanysty «Bolashaq» baǵdarlamasy boıynsha tehnıkalyq jáne IT mamandyqtarǵa granttar sany 60 paıyzǵa deıin ulǵaıtyldy. Bul «Injenerlik júıeler men jeliler», «Avıasıa jáne aeroǵaryshtyq tehnıka. Áýe qozǵalysyn basqarý», «Úlken derekterdi taldaý», «Jańa materıaldar tehnologıasy», «Derekter bazasyn basqarý», «Avıasıalyq tehnıka jáne tehnologıalar», «Mashına jasaý», «Ónerkásiptik avtomattandyrý» jáne t.b.», - dedi BǴM Halyqaralyq baǵdarlamalar ortalyǵynyń basqarma tóraǵasy Ánýar Janǵozın.
Jalpy bıyl «Bolashaq» baǵdarlamasy boıynsha basym mamandyqtar tiziminde akademıalyq oqýǵa 92, taǵylymdamadan ótýge 158 mamandyq qarastyrylǵan.
Eńbek naryǵynyń úrdisterin taldaý negizinde osy jyly tizilimge ınovasıalar, jańa tehnologıalar, medısına jáne ónerkásiptik ınjenerıa, jaratylystaný ǵylymdary salasyndaǵy 40 jańa mamandyq engizildi. Sonymen qatar olardyń 17-si ataýlaryn keńeıtý arqyly burynnan bar mamandyqtarǵa endi. Jalpy, basym mamandyqtar tizimi tehnıkalyq mamandyqtarmen 30%-ke keńeıtildi.
«Bolashaq» halyqaralyq stıpendıasyna konkýrstyq irikteý 3 kezeńnen turady: keshendi testileý, Táýelsiz sarapshylyq komısıasy múshelerimen jeke áńgimelesý jáne shetelde kadrlar daıarlaý jónindegi respýblıkalyq komısıa otyrysynda qujattardy qaraý.