Sondaı-aq ǵylymı taǵylymdamalar baǵdarlamasy boıynsha grant ıegerleri belgili boldy
182 qazaqstandyq «Bolashaq» halyqaralyq stıpendıasynyń ıegeri atandy. Onyń ishinde 149 adam álemniń úzdik joǵary oqý oryndarynyń magıstratýrasynda, 7 adam doktorantýrasynda bilim alady, 26 qazaqstandyq álemniń jetekshi joǵary oqý oryndary men óndiristik ortalyqtaryna taǵylymdamadan ótedi, dep habarlaıdy Almaty-akshamy.kz.
Stıpendıattardyń basym kópshiligi jaratylystaný-tehnıkalyq baǵyttar boıynsha shetelde daıarlanatyn bolady.
«Memleket basyshysynyń tapsyrmasy boıynsha ınjenerlik-tehnıkalyq kadrlardy daıarlaýǵa basymdyq beriledi. Úmitkerlerdi qoldaý úshin «Injenerlik-tehnıkalyq qyzmetkerler» jańa jeńildik sanaty engizildi. Sonymen qatar bizdiń bastamamyzben medısınalyq qyzmetkerlerdi irikteý qaǵıdalary jetildirildi», - dep atap ótti «Halyqaralyq baǵdarlamalar ortalyǵy» AQ Basqarma tóraǵasy Oljas Sákenov.
Sondaı-aq Shetelde kadrlar daıarlaý jónindegi respýblıkalyq komısıanyń sheshimimen 328 qazaqstandyq ǵylymı taǵylymdamalar baǵdarlamasy boıynsha grant ıegeri atandy.
Otandyq ǵalymdar ınjenerlik ǵylymdar, aqparattyq-kommýnıkasıalyq tehnologıalar, bilim berý, agroónerkásiptik keshen, medısına jáne t.b. salalarda zertteýler júrgizý úshin álemniń jetekshi ǵylymı ortalyqtaryna jiberiletin bolady.
Esterińizge sala keteıik, bıyl «Bolashaq» halyqaralyq stıpendıasyn taǵaıyndaý konkýrsyna qatysýǵa qujat qabyldaý tórt lekte ótedi. Úshinshi legi bıylǵy jylǵy 7 shildege deıin jalǵasady. Jyl sońyna deıin taǵy bir legi 17 shilde men 15 qyrkúıek aralyǵynda ótetin bolady.
Ǵylymı taǵylymdamalar baǵdarlamasy boıynsha konkýrstyq irikteýge qatysýǵa ótinimderdi qabyldaý 2023 jylǵy 28 tamyz ben 13 qazan aralyǵynda jalǵasatyn bolady.
«Bolashaq» stıpendıasy ıegerleriniń tizimi men ǵylymı taǵylymdamalar baǵdarlamasy boıynsha granttar ıegerleriniń tizimi myna jerden kórýge bolady.