Injenerlik-tehnıkalyq kadrlardy daıarlaýǵa basa mán berildi
Qazaqstan Respýblıkasynyń Memlekettik keńesshisi Erlan Qarınniń tóraǵalyǵymen Shetelde kadrlar daıarlaý jónindegi respýblıkalyq komısıanyń kezekti otyrysy ótti. Komısıa sheshimimen «Bolashaq» halyqaralyq stıpendıasy 199 qazaqstandyqqa berildi. Olar magıstratýra men doktorantýrada oqıtyn bolady, dep habarlaıdy Almaty-akshamy.kz Aqordanyń resmı saıtyna silteme jasap.
Prezıdent Qasym-Jomart Toqaevtyń «Bolashaq» baǵdarlamasyn qaıta baǵdarlaý jónindegi tapsyrmasyna sáıkes ınjenerlik-tehnıkalyq kadrlardy daıarlaýǵa basa mán berildi. Eger ótken jyly ınjenerlik-tehnıkalyq mamandyqtarǵa 36% stıpendıa bólinse, bıyl 60% bólindi. Sonymen qatar, medısınalyq baǵyttaǵy akademıalyq baǵdarlamalarǵa úmitkerlerdiń qoljetimdiligin jáne qyzyǵýshylyǵyn arttyrý maqsatynda Respýblıkalyq komısıa medısına qyzmetkerlerin akademıalyq oqytý úshin jeke sanat bólý týraly sheshim qabyldady. Jalpy, bıyl magıstratýra men rezıdentýrada oqýǵa 385 stıpendıa, doktorantýra baǵdarlamalary boıynsha 60 stıpendıa bólindi. Osy jyldyń sońyna deıin Respýblıkalyq komısıanyń taǵy eki otyrysy ótedi. «Bolashaq» halyqaralyq stıpendıasyn taǵaıyndaý konkýrsyna qatysý úshin qujat qabyldaý bıylǵy 30 mamyrda bastaldy jáne 14 qazanǵa deıin sozylady. Taǵylymdamadan ótý úshin qujat qabyldaý 2022 jylǵy 5 qyrkúıekte bastalyp, 14 qazanǵa deıin sozylady. Jıyn qorytyndysy boıynsha Erlan Qarın birqatar naqty tapsyrma berdi.