Jekpe-jekterde 20-ǵa jýyq tóreshi qyzmet etedi
Búgin Pavlodar qalasyndaǵy «Baıantaý» sport saraıynda bokstan erler arasyndaǵy Qazaqstan chempıonaty bastaldy, dep habarlaıdy Almaty-akshamy.kz.
«Sportty damytý dıreksıasy» RMQK-dan málim etkendeı, bıyl ár óńirden kelgen 216 bylǵary qolǵap sheberi 9 jeltoqsanǵa deıin synǵa túsedi.
«Tarıhqa úńiler bolsaq, táýelsiz Qazaqstannyń alǵashqy chempıonaty osy oblystaǵy Ekibastuz qalasynda 1993 jyly uıymdastyryldy. Al 2016 jyly Kereký óńiri elimizdegi basty básekeni 2-márte qabyldady. Arada kóp ýaqyt ótpeı, sharshy alań sheberleri munda qaıta jınaldy», - delingen habarlamada.
IBA erejesi boıynsha 13 salmaqtyń (48, 51, 54, 57, 60, 63,5, 67, 71, 75,80, 86, 92, +92 kg) chempıony men júldegerleri belgili bolady. Chempıonatqa 2004 jylǵa deıin dúnıege kelgen sportshylar qatysady.
Jekpe-jekterde 20-ǵa jýyq tóreshi qyzmet etedi. Qazylar alqasynyń tóraǵasy, halyqaralyq dárejedegi tóreshi – Qaırat Jamanqulov.
Jankúıerlerge kirý tegin.