Zań jobasy maquldandy.
Qazaqstandyq blogerler salyq tóleýge mindetteledi jáne jalǵan aqparat úshin jańa aıyppul engiziledi, dep habarlaıdy Almaty-akshamy.kz
Májilis "Onlaın-platformalar jáne onlaın-jarnama týraly" zań jobasyn birinshi oqylymda maquldady.
Zań jobasyna parlament depýtattary bastamashy bolǵan. Májilis depýtaty Aıdos Sarymnyń aıtýynsha, zań jobasynda onlaın jarnama, ınflúenser jáne jalǵan aqparat uǵymdary engizilgen.
"Osy kezge deıin biz dástúrli jarnamany jaqsy bilemiz. Teledıdardy qossaq, aıqyn kórip otyramyz, gazet-jýrnaldardy ashsaq ta, jarnama anyq kórinip turady. Bizdiń oıymyzsha, azamattardyń quqyǵyn qorǵaý úshin, olar aldanbaý úshin, erteń qarjylyq pıramıdaǵa tap bolmaý úshin áleýmettik jelidegi jarnamany da, demeýshilik kontentti de aıqyn kórsetýimiz kerek. Álemdik tájirıbede bul bar. Ol blogerlerden, ınflúenserlerden osyny talap etedi", - dedi Sarym májilistiń jalpy otyrysynda zań jobasyn tanystyryp.
Sondaı-aq ınternet arqyly tabys tabatyn blogerler endi salyq tóleýge mindetteledi.
"Sheteldiń maqaly bar: kez kelgen adam ólim men salyqtan qutyla almaıdy degen. Olaı bolsa, bizdiń zamandastarymyz da, jýrnalıserimiz de aıtyp otyr: nege biz barlyǵy úshin salyq tóleımiz, al ınternette mıllıardtap, mıllıondap aqsha jınap jatqan azamattar memlekettik qazynaǵa bir tıyn da quımaıdy degen máseleni qoıyp otyr. Osy sebepti biz bloger, ınflúenser degen uǵymdy engizdik. Osy sebepti de jarnamanyń san alýan túrlerin zańǵa bekitip, aldaǵy ýaqytta munyń barlyǵy, eń aldymen Kásipkerlik kodekske jáne jyl sońynda keletin Salyq kodeksine enip, sur ekonomıkada júrgen dúnıeniń barlyǵyn ashyq alańǵa shyǵarý, memleket qazynasyn toltyrýǵa paıdalaný qajet dep esepteımiz", - dedi májilismen.
Onyń aıtýynsha, búginde jarnamanyń alpys paıyzy ınternet salasyna ketip jatyr. Bul qazirgi tańda trıllıondaǵan aqsha bolýy yqtımal. Zań jobasyndaǵy taǵy bir jańashyldyq – jalǵan aqparat úshin salynatyn aıyppul.
"Basty máseleniń biri – biz jalǵan aqparat degen uǵymdy engizip otyrmyz. Bul bizdiń zańnamany jartylaı dekrımınalızasıalaý dep esepteımiz, sebebi barlyq máseleni sot arqyly sheshý kerek jáne onyń ishinde aıyppuldar bolýy kerek. Adam qasaqana emes, qatelesip ketse, basqa da jaǵdaıattar bolsa, jalǵan aqparaty kóp zıan tıgizbese, onda 20 AEK (69 000 teńge) mólsherinde aıyppul tóleıdi. Eger dál osy áreketti qaıtalasa, aıyppul eki eselenedi. Zańdy tulǵalarǵa da osyndaı tıisti baspaldaq bar", - dep túsindirdi Sarym.
Májilis depýtattary atalǵan zań jobasyn birinshi oqylymda maquldady.