Qazaqstan Respýblıkasynyń Mádenıet jáne aqparat mınıstri Aıda Balaeva onlaın-jarnamany tańbalaý qaǵıdalaryn bekitý týraly buıryqqa qol qoıdy, dep habarlaıdy almaty-akshamy.kz
Buıryqqa sáıkes, «Onlaın-platformalar jáne onlaın-jarnama týraly» zańǵa sáıkes onlaın-jarnama tańbalaýǵa jatady.
«Kontentte aksıalar jasalǵan jáne baǵasy tómendetilgen taýarlarǵa, jumystarǵa nemese kórsetiletin qyzmetterge siltemeler, sondaı-aq ınternet-resýrstarǵa, jarnama berýshiniń nemese jarnama taratýshynyń onlaın-platformalardaǵy akkaýnttaryna siltemeler qamtylsa, onlaın-jarnama tańbalanýǵa jatady», – dep jazylǵan buıryqta.
Tańbalaý ony sáıkestendirý múmkindigimen mátindik formatta júzege asyrylýy kerek. Eger onlaın-jarnama dybystyq nemese aýdıokórneki nysanda taratylǵan jáne ornalastyrylǵan bolsa, tańbalaý onlaın-jarnamanyń aldynda júzege asyrylýǵa tıis. Iaǵnı tańbalaýda ornalastyrylǵan materıaldyń jarnama ekendigi týraly mátindik nusqama bolýy shart.
Mátindik nusqama mynadaı tujyrymdamalardyń birin qamtıdy.
Endi blogerler jarnamany arnaıy mınıstrlik bekitken mátinmen tańbalaýy tıis. Onlaın jarnama:
- «jarnama»;
- «jarnamalyq materıal»;
- «seriktestik materıal»;
- «demeýshilik materıal»;
- «jarnama quqyǵynda»;
- «demeýshimen tólengen»;
- «PR quqyǵynda» dep belgilenip otyrady.
Qujatta lezdik habar almasý servısinde ornalastyrylatyn onlaın-jarnama men teleradıoarnalardyń onlaın-platformalardaǵy akkaýnttarynda ornalastyrylǵan tele-radıo baǵdarlamalardaǵy nemese olardyń fragmentterindegi jarnama, áleýmettik jarnama tańbalanýǵa jatpaıtyny jazylǵan.
Kúzde Memlekettik kirister komıteti Qazaqstanda «onlaın-platformalar jáne onlaın-jarnama týraly» zań kúshine engennen keıin 44 blogerdiń 42,5 mln teńge salyq jáne áleýmettik tólemder tólegenin habarlady.
Vedomstvo blogerler tólegen salyqtardyń jalpy somasy 2024 jyldyń sáýir aıynda, olar jyl qorytyndysy boıynsha kirister týraly deklarasıany usynǵan kezde belgili bolatynyn atap ótti.
Komıtettiń 2023 jylǵy 15 qazandaǵy málimeti boıynsha, birde-bir blogerdiń salyqtar men áleýmettik tólemder boıynsha qaryzy joq. Alaıda 23 blogermen jumys júrgizilýde. Eger olar óz mindettemelerin oryndamasa, olarǵa aıyppul salynyp, tabysynyń nemese múlkiniń bir bóligi tárkilenýi múmkin.