BJZQ salymshylarynyń 2024 jyldyń birinshi aıyndaǵy taza ınvestısıalyq kirisi 109,6 mlrd teńgeden asty
Aǵymdaǵy jyldyń birinshi aıynda BJZQ salymshylarynyń shottaryna 109,6 mlrd teńgeden asa taza ınvestısıalyq kiris esepteldi. Bul ótken jyldyń sáıkes kezeńiniń kórsetkishterinen 45,7 mlrd teńge nemese 72% artyq, dep habarlaıdy almaty-akshamy.kz.
2024 jyldyń 1 aqpanyndaǵy jaǵdaı boıynsha salymshylardyń (alýshylardyń) shottaryna bólingen BJZQ zeınetaqy aktıvteriniń kiristiligi sońǵy 12 aıda 10,3% qurady. Bul kezeńdegi ınflásıa 9,5% mólsherinde boldy.
Investısıalyq kiris qarjy quraldary (baǵaly qaǵazdar, salymdar jáne basqa operasıalar) boıynsha syıaqy túrindegi kiristerden, qarjy quraldaryn naryqtyq jáne valútalyq qaıta baǵalaýdan, syrtqy basqarýdaǵy aktıvter boıynsha kiristerden jáne t. b. turady. QR Ulttyq Banki jáne ınvestısıalyq portfeldi basqarýshylar (IPB) zeınetaqy aktıvterin ınvestısıalyq kiris alý maqsatynda Qazaqstandaǵy jáne sheteldegi ekonomıkanyń túrli sektorlarynyń ár túrli qarjy quraldaryna túrli valútalarda ornalastyrady. Investısıalyq portfeldi ártaraptandyrý (ınvestısıalaý quraldary men naryqtarynyń alýan túrliligi) zeınetaqy jınaqtarynyń saqtalýyn jáne ornyqty tabystylyǵyn qamtamasyz etedi.
1998 jyly jınaqtaýshy zeınetaqy júıesi qurylǵan kúnnen bastap ınvestısıalyq kiris 2024 jylǵy 1 aqpanda shamamen9,5 trln teńge boldy. Al búkil kezeń ishinde jınaqtalǵan ınflásıa 761,15% bolǵanda jınaqtalǵan ınvestısıalyq kiristilik óspeli qorytyndymen 822,03% kórsetti. Osylaısha, uzaq merzimdi kezeńdegi jınaqtalǵan ınvestısıalyq kiris ınflásıadan asyp tústi.
Esterińizge sala keteıik, Qazaqstanda ınflásıa deńgeıin eskere otyryp, mindetti zeınetaqy jarnalarynyń saqtalýyna biregeı kepildik bar. Tipti, salymshynyń jınaqtalǵan kiristiligine áser etken kiristiliktiń tómendeýi oryn alǵan jekelegen kezeńder úshin de memleket tólem alý quqyǵy bastalǵan kezde aıyrmashylyqty óteýge kepildik beredi.
Zeınetaqy aktıvterin ınvestısıalyq basqarý men esepke alýdyń búkil júıesi ashyq: árbir salymshynyń enpf.kz saıtyndaǵy jeke kabınetinde nemese uıaly qosymshada óziniń ınvestısıalyq tabysyn kórýge múmkindigi bar.
BJZQ zeınetaqy aktıvterin ınvestısıalyq basqarý jáne olar ornalastyrylǵan qarjy quraldary týraly aqparat Qordyń (www.enpf.kz) resmı saıtyndaǵy «Kórsetkishter/Investısıalyq qyzmet» bóliminde jarıalanady.
Kóptegen mańyzdy jáne paıdaly aqparatty, sonyń ishinde jınaqtaýshy zeınetaqy júıesi sarapshylarynyń zeınetaqy aktıvterin ınvestısıalaý týraly suhbatty - BJZQ ENPF YouTube-arnasynan kórýge bolady.