Qazaqstanda 2024 jyldan bastap bıznesti memlekettik baqylaýdyń avtomattandyrylǵan júıesi iske qosylady
Úkimette kásipkerlik salasynda «taza paraqtan» retteýdi engizý jáne bıznes sýbektilerin memlekettik baqylaý jáne qadaǵalaý júıesin avtomattandyrý máseleleri qaraldy, dep habarlaıdy almaty-akshamy.kz
QR Premer-Mınıstri Álıhan Smaıylovtyń tóraǵalyǵymen ótken keńeste memlekettik organdar «Atameken» UKP-men birlesip, bıznesti retteýdiń 44 salasyna taldaý jasaǵany aıtyldy. Nátıjesinde jańa retteý saıasatynyń sharttaryna sáıkes kelmeıtin 10 108 talap anyqtaldy.
Ulttyq ekonomıka mınıstri Álibek Qýantyrovtyń aıtýynsha, búginde kásipkerlerge qoıylatyn negizsiz talaptardy joıýǵa arnalǵan zańnamalyq aktilerge 386 túzetýden turatyn biryńǵaı pýl qalyptastyrylǵan. Jaqyn arada olardy Parlamenttegi Bıznesti júrgizý máseleleri týraly zań jobasyna (9 paket) qosý josparlanyp otyr. Sonymen qatar memlekettik organdar zańǵa táýeldi aktilerge sáıkes talaptardyń kúshin joıýdy jáne qaıta qaraýdy iske asyrýda.
Sondaı-aq «Atameken» UKP basqarma tóraǵasynyń orynbasary Málik Sáýlebaı, aýyl sharýashylyǵy mınıstri Erbol Qarashókeev, energetıka mınıstri Almasadam Sátqalıev, ındýstrıa jáne ınfraqurylymdyq damý vıse-mınıstri Dınara Sheglova atqarylyp jatqan jumystarǵa toqtaldy.
Premer-Mınıstr retteýshi talaptardyń kúshin joıýǵa nemese olardy qaıta qaraýǵa baǵyttalǵan zańǵa táýeldi aktiler boıynsha tıisti jumystar júrgizilgenin atap ótti: 625 quqyqtyq aktiniń 513-i qabyldandy. Sonymen qatar 112 quqyqtyq akti boıynsha jumys júrip jatyr.
Osy oraıda Álıhan Smaıylov aýyl sharýashylyǵy, energetıka, ındýstrıa jáne ınfraqurylymdyq damý mınıstrlikterine atalǵan jumysty 30 maýsymǵa deıin aıaqtaýdy tapsyrdy.
«Salalyq buıryqtar belgilengen merzimde qabyldanbaǵan jaǵdaıda, Úkimet Apparaty saıası memlekettik qyzmetshilerdi tártiptik jaýapkershilikke tartý týraly tıisti usynymdar engizsin», — dedi ol.
Sonymen qatar Premer-Mınıstr jaýapty memlekettik organdarǵa «Atameken» UKP-men birlesip, kásipkerlerge túsetin júktemeni aıtarlyqtaı jeńildetetin bıznes úshin esep berýdi qysqartý máselesin odan ári pysyqtaýdy tapsyrdy.
Kún tártibindegi ekinshi másele aıasynda byltyr bıznesti memlekettik baqylaýdyń 35 baǵytyn avtomattandyrý isi aıaqtalyp, qazirgi tańda taǵy 35 baǵyt boıynsha jumystar júrgizilip jatqany aıtyldy.
UEM basshysy Álibek Qýantyrov avtomatty fýnksıonaldyǵy bar Smart Data Ukimet platformasy paıdalanýǵa daıyn ekenin aıtty. Ol qazirgi ýaqytta jumys aprobasıasynan ótýde. Osylaısha, memlekettik baqylaý men qadaǵalaýdyń avtomattandyrylǵan júıesi 2024 jyldan bastap iske qosylady.
Platformany tehnıkalyq baptaý týraly sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın baıandama jasady. Sondaı-aq «Atameken» UKP basqarma tóraǵasynyń orynbasary Málik Sáýlebaı, aýyl sharýashylyǵy mınıstri Erbol Qarashókeev, ındýstrıa jáne ınfraqurylymdyq damý vıse-mınıstri Dınara Sheglova táýekelderdi basqarý júıelerin (TBJ) avtomattandyrý máseleleri boıynsha óz pikirlerin bildirdi.
Premer-Mınıstr aýyl sharýashylyǵy, ındýstrıa jáne ınfraqurylymdyq damý mınıstrlikteri osy jyldyń 30 maýsymyna deıin salalyq táýekelderdi basqarý júıesiniń qabyldanýyn qamtamasyz etýi qajettigin atap ótti.
«Kelesi jyldan bastap barlyq tekserýler men baqylaýlar táýekelderdi basqarý júıesi negizinde júzege asyrylýy úshin bıyl memlekettik baqylaýdy avtomattandyrý boıynsha jumysty aıaqtaýymyz kerek», — dep túıindedi sózin Álıhan Smaıylov.