Premer-Mınıstr Álıhan Smaıylov «Qazaqstandyq qamtý 2.0» halyqaralyq forýmynda sóılegen sózinde bıznesti qoldaý baǵytynda atqarylyp jatqan sharýalarǵa toqtaldy, dep habarlaıdy almaty-akshamy.kz.
«Sońǵy jyldardaǵy oqıǵalar jahandyq jáne aımaqtyq ekonomıkaǵa orasan zor áserin tıgizdi. Kúrdeli syn-qaterlerge qaramastan, Qazaqstan ekonomıkasy syrtqy jaǵdaılarǵa beıimdeldi jáne turaqty ósý jolynda. Aǵymdaǵy jyldyń 10 aıynyń qorytyndysy boıynsha ekonomıkanyń ósýi 4,9%-ti qurady. Negizgi salalar boıynsha oń dınamıka qalyptasyp otyr. Negizgi kapıtalǵa salynǵan ınvestısıalar 12,6%-ke ulǵaıyp, 13,3 trln teńgeni qurady», - dedi ol.
Premer-Mınıstr ınflásıa 10,8%-ke deıin baıaýlaýyna Úkimet pen Ulttyq banktiń is-sharalary yqpal etkenin atap ótti.
«Bıznestiń máseleleri Úkimette «Atameken» palatasymen birlese turaqty túrde qaralyp keledi. Shaǵyn jáne orta bıznestiń jalpy ishki ónimdegi úlesi 36,4%-ke deıin ulǵaıdy. Osy sektorda jumyspen qamtylǵandar sany bıyl 14%-ke ósip 4,3 mln adamdy qurady. Bıznesti júrgizý úshin qolaıly jaǵdaı jasaý baǵytynda júıeli is-sharalar qabyldanýda. Máselen, bızneske qoıylatyn artyq talaptardy qysqartý úshin jańa retteýshi saıasat iske asyrylýda. Qazirdiń ózinde 9 myń artyq talap qysqartyldy. Jyl sońyna deıin taǵy 1 myńyn qysqartamyz», - dedi Úkimet basshysy.