Almatyda otandyq óndirýshilerdi «Jaıly mektep» ulttyq jobasyn iske asyrýǵa tartatyn bolady, dep habarlaıdy Almaty-akshamy.kz
Almaty qalasy ákiminiń orynbasary A.E. Ábdiqadyrovtyń tóraǵalyǵymen ótken keńeıtilgen keńes barysynda «Atameken» kásipkerler Palatasynyń, «Samruk-Kazyna Construction» AQ ókilderiniń, Almaty qalasy máslıhaty depýtattarynyń, qurylys salýshy kompanıalar men bıznes-qoǵamdastyqtyń qatysýymen «Jaıly mektep» ulttyq jobasy talqylandy, onyń aıasynda qalada 37,1 myń oqýshy oryndy 22 mekteptiń qurylysy josparlanýda. Qatysýshylar bolashaqta salynatyn mektepterdi jıhazben jáne qurylǵylarmen jabdyqtaý, salý jáne jaraqtandyrý máselelerin talqylady, sapasy jaǵynan álemdik balamalardan kem túspeıtin qazaqstandyq qurylys materıaldaryn óndirýshilerdiń ónimderimen (qurǵaq qurylys qospalary, shatyr, árleý jáne lak-boıaý materıaldary, terezelerge arnalǵan metal profılder, esikter, jıhaz jáne t.b.) tanysty.
Almaty qalasy ákiminiń orynbasary Álisher Ábdiqadyrov óziniń quttyqtaý sózinde atap ótkendeı, óńdeý ónerkásibi qaladaǵy basym salalardyń biri bolyp tabylady. Aǵymdaǵy jyldyń qańtar-sáýir aılary aralyǵynda 657,6 mlrd.teńgege ónerkásip ónimi óndirildi, bul byltyrǵy kezeńmen salystyrǵanda 123,1%– dy quraıdy (QR boıynsha-103,5%). Eń joǵary ósim kólemi daıyn metal buıymdary men mashına jasaý óndirisinde.
«Qazirgi ýaqytta jobalaý-smetalyq qujattama ázirlenýde, mektepterdiń qurylysy kúzde bastalady. Mektepter salý boıynsha belgilengen tásilderge sáıkes olardy jaraqtandyrý negizinen otandyq óndiristiń taýarlarymen júzege asyrylady. Ákimdik óz tarapynan osy jobany iske asyrýda jergilikti óndirýshilerge barynsha qoldaý kórsetýge daıyn», - dedi Álisher Ábdiqadyrov.
Keńes barysynda máslıhat depýtaty Igor Prosenko jaıly mektepter men basqa da áleýmettik ınfraqurylym nysandaryn salýdyń arqasynda óńdeýshi ónerkásipti keń aýqymǵa deıin damytýǵa naqty múmkindik bar ekenin aıtty. «Samruk-Kazyna Construction» AQ Almaty qalasy boıynsha jobalar jetekshisi Almaz Úndigenov búginde qaladaǵy segiz mektep boıynsha qurylys salýshylarmen kelisimder jasalǵanyn aıtty.
Aıta keterligi, sońǵy onjyldyqta Almaty qalasy boıynsha oqýshylar sany jyl saıyn halyqtyń tabıǵı ósýi men ishki kóshi-qon esebinen orta eseppen 12-14 myń balaǵa artýda. Osy kezeńde birinshi synyp oqýshylarynyń sany túlekter sanynan eki ese kóp boldy. Bul rette qoldanystaǵy ınfraqurylym mektepterdegi ósip kele jatqan qajettilikterden aıtarlyqtaı keıin qaldy. Jańa mektepter zamanaýı standarttardy, qajetti ınfraqurylymdy, joǵary jyldamdyqtaǵy ınternetti qamtamasyz ete otyryp, salynatyn bolady.