Sharıǵatymyzda ósimge (kredıt) tyıym salynǵan.
Ol ústeme aqshamen berý bolǵandyqtan, kesimdi túrde aram bolady. Onyń aram ekeni Allanyń kitabynda, Paıǵambarymyzdyń (oǵan Allanyń salaýaty men sálemi bolsyn) súnnetinde de baıandalǵan ári barlyq ǵalymdar biraýyzdan onyń aram ekenine kelisken.
Quranda: «Alla Taǵala saýda-sattyqty adal, al ósimdi aram etti», – dedi. Jábırden (oǵan Alla razy bolsyn) jetken hadıste Paıǵambarymyz (oǵan Allanyń salaýaty men sálemi bolsyn): «Ósim jeýshini, jegizýshini, kelisimdi jazýshyny, oǵan kýáger bolǵandardy laǵynettedi jáne «Olardyń bári kúnáda birdeı dedi», – degen. Sondyqtan musylman adam eshqandaı zárýlik bolmasa paıyzǵa jolamaýy, bilmestikpen alyp qoıǵan jaǵdaıda Allaǵa shynaıy táýbe etýi kerek.
Rızyq – Alladan. Adam óziniń rızyǵyn izdegenindeı, rızyǵy da óz ıesin izdeıdi. Ol qaı jerde bolmasyn, ony ajaly izdep tapqanyndaı, rızyq ony izdep tabady. Jábır ıbn Abdýlladan jetken hadıste Paıǵambarymyz (oǵan Allanyń salaýaty men sálemi bolsyn) bylaı dedi: «Ýa, Adamdar! Rızyqtaryńdy talap etýde kórkemdik tanytyńdar. Óıtkeni adam ony tolyq almaı, bul dúnıeden ótpeıdi. Alladan qorqyp, ony talap etýde durys jol izdeńder. Adal bolǵanyn alyp, aram bolǵanyn tastańdar», – dedi.
Qoryta aıtqanda, Quranda, hadıste aıtylǵandaı, kredıt alý kúnáli iske jatady. Adam dúnıege kelmeı jatyp anasynyń ishinde bolǵanda onyń rızyqnesibesi jazylady. Sondyqtan taǵdyryna jazylǵan rızyqty izdeýde musylman adam sharıǵatqa saı adal joldy izdeýi kerek.
(«Iman» jýrnaly, №7, 2024 jyl)