Kásipkerlik negizderine oqytý jańa formatta qoljetimdi boldy.
Qazaqstan Úkimeti óz isin bastaǵysy kelgen memleket azamattaryna onlaın-formatta bilim alýǵa múmkindik berip otyr. Bıznes negizderin úıretetin joba jańa formatta qoljetimdi boldy, dep habarlaıdy Almaty-akshamy.kz.
«2022 jylǵy 25 shildeden bastap «Bastaý Bıznes» jobasy sheńberinde kásipkerlik negizderine oqytý jańa formatta qoljetimdi boldy. Óz isin bastaýdy josparlap otyrǵan qazaqstandyqtar endi Skills.enbek.kz platformasy arqyly onlaın rejımde bıznes júrgizý úshin bazalyq bilim men daǵdylardy ala alady», - delingen Eńbekmıni baspasóz qyzmetiniń habarlamasynda.
«Bastaý Bıznes» jobasy 2021-2025 jyldarǵa arnalǵan kásipkerlikti damytý jónindegi ulttyq joba arqyly azamattardyń bıznes-bastamalaryn qoldaýdyń memlekettik sharalar kesheni sheńberinde iske asyrylady.
Oqý kýrsyna jazylý úshin Business.enbek.kz portalda tirkelý, oqytý sharttaryna sáıkestigine avtomatty tekserýden ótý qajet. Sharttarǵa sáıkes bolǵan jaǵdaıda qatysýshy Skills.enbek.kz platformaǵa ótip, oqýǵa kirise alady.
«Bastaý Bıznes» jobasy aıasynda kásipkerlik negizderine oqytý» onlaın kýrsynyń qatysýshylary bola alady:
1) jumyssyzdar;
2) isin jańa bastaǵan jáne jumys istep turǵan kásipkerler;
3) zeınetkerlik jasqa jetpeı jumystan qysqartylatyn qyzmetkerler;
4) jeke kásipker retinde tirkelmeı kiris alý maqsatynda taýarlardy óndirý (ótkizý), jumystardy oryndaý jáne qyzmetterdi kórsetý jónindegi qyzmetti derbes júzege asyratyn tulǵalar jáne (nemese) jumys istemeıtin jeke kásipkerler;
5) otbasylyq kásipkerlikte aqy tólenbeıtin qyzmetti derbes júzege asyratyn tulǵalar;
6) tabysy eń tómengi kúnkóris deńgeıinen tómen, satý (aıyrbastaý) úshin jeke qosalqy sharýashylyqta ónim óndirý jónindegi qyzmetti derbes júzege asyratyn tulǵalar;
7) tabystary eń tómengi kúnkóris deńgeıinen tómen óndiristik kooperatıvterdiń músheleri.
Oqytý 14 kúntizbelik kúnnen aspaıdy. Ár qatysýshy kýrsty jeke-jeke meńgerýmen aınalysady. Oqý tolyǵymen tegin.
Oqytý kelesi kezeńderden turady:
- birneshe modýl boıynsha onlaın oqytý kýrsy;
- qorytyndy testileý;
- oqýdan ótkeni týraly sertıfıkat alý.
Oqý barysynda paıdalanýshy birneshe sabaqtardan turatyn 12 modýlden ótýi kerek. Árbir modýl aıaqtalǵan soń aralyq testileý ótkiziledi. Kelesi oqý modýline ótý úshin qatysýshy testileýdi tapsyrý kezinde durys jaýaptardyń keminde 70%-yn jınaýy kerek. Aralyq testileýden ótý áreketteriniń sany shektelmeıdi.
«Bastaý Bıznes» jobasy boıynsha kásipkerlik negizderine oqytý» onlaın kýrsy eger qatysýshy qorytyndy testileýdi tapsyrý kezinde durys jaýaptardyń 70% - dan astamyn jınaǵan jaǵdaıda ótti dep esepteledi. Durys jaýaptardyń 70%-ynan tómen jınaǵan qatysýshyǵa qorytyndy testileýden 2 ret qaıta ótý múmkindigi beriledi.
Oqytý qorytyndysy boıynsha qatysýshy biregeı nómiri bar elektrondyq sertıfıkat alady. «Bastaý Bıznes» jobasy boıynsha kásipkerlik negizderine oqytý týraly sertıfıkattyń qoldanylý merzimi 3 jyldy quraıdy.
«Bastaý Bıznes» jobasy sheńberinde kásipkerlik negizderine oqytý» onlaın kýrsynan ótken qatysýshylar ulttyq joba sheńberinde bıznes-ıdeıalardy iske asyrýǵa grant alýǵa úmitker bola alady.