Memleket basshysynyń joldaýynda kópshiliktiń nazaryn aýdarǵan mańyzdy máselelerdiń biri — beıbit atomdy paıdalaný.
Bul máselege kópshiliktiń qyzyǵýshylyq tanytatyny belgili. Sebebi, aldaǵy ýaqytta óndiristiń ósýi, demografıalyq jaǵdaı, halyq sanynyń artýy sıaqty faktorlarǵa baılanysty, mamandardyń aıtýynsha, energetıka salasynda tapshylyq týyndaýy múmkin. Osy turǵyda bizge atom elektr stansıalaryn salý qajet bolýy yqtımal. Birinshiden, bul ekologıalyq jaǵynan qaýipsiz, ekinshiden, elektr qýatyn arzan ári turaqty túrde óndirýge múmkindik beredi.
Prezıdent joldaýynda bul máseleni halyqtyń talqysyna salý týraly aıtty. Referendým altynshy qazanda ótedi, onda AES salý kerek pe, joq pa degen suraqty halqymyz sheshedi. Osy referendýmda naqty suraq qoıylyp, "Qaı elder AES salyp jatyr?", "Qaı eldiń tájirıbesin qoldaısyz?" degendeı naqty talqylaýlar bolýy kerek dep oılaımyn.
Jalpy, prezıdenttiń joldaýynda eldiń ómirine qatysty kóp kútken máseleler men suraqtarǵa jaýaptar berilip jatyr.