Ulttyq testileý ortalyǵynyń dırektory Rýslan Emelbaev UBT tapsyrýshylarǵa úndeý tastady, dep habarlaıdy Almaty-akshamy.kz QazAqparatqa silteme jasap.
«Statısıka boıynsha jyl saıyn UBT-daǵy ereje buzýshylardyń sany azaıyp kele jatyr. Máselen, 2019 jyly testileýge kirgizý barysynda 128 myń, 2020 jyly – 2 522, 2021 jyly – 756, 2022 jyly – 327 tyıym salynǵan zat anyqtaldy. Iaǵnı, kórsetkish 400 ese azaıǵan. Bul talapkerlerdiń búginde óz bilimderine senip, akademıalyq adaldyq erejelerimen jaqsy tanys ekenin kórsetedi», - dep jazdy ol Instagram paraqshasynda.
Sondaı-aq, ol «shpargalka» paıdalanýshylar sany azaıǵanymen, múldem joıylyp ketpegenin aıtady.
«Bıylǵy UBT-nyń 5 aptasy boıynsha anyqtalǵan eń kreatıvti «tásilderdi» osy jazbada usynyp otyrmyn. Talapkerlerdiń, ókinishine qaraı, bizdiń qyraǵy baqylaýshylardy aldaýy múmkin bolmady. Balalardyń erekshe shyǵarmashylyq jumystary birden anyqtaldy. Testileý erejelerin buzý týraly bizge kelip túsken árbir ótinish qarastyrylady. Esterińizde bolsa, byltyr postmonıtorıng qorytyndysy boıynsha 200-den astam adamnyń test nátıjesin joıdyq. Onyń ishinde 137-i grant ıegeri bolǵan. Bıyl da bul jumys óz jalǵasyn tabady.
Bıylǵy UBT-nyń aıaqtalýyna 2 apta qaldy. Talapkerlerdi akademıalyq adaldyq prınsıpterin saqtaýǵa shaqyramyn. Jetistikke jetýdiń basty sharty bilimdi bolý ekenin umytpańyzdar», - dedi Rýslan Emelbaev.