Kúzdiń sándi tústeri: Pantone-niń usynystary jáne stılıs keńesi
Kúz – kıim, aksesýar jáne syrtqy obrazdy tolyq jańartý kezeńi. Bıylǵy kúzdiń tústeri burynǵydan da erekshe. Sán álemindegi tús sarapshysy – Pantone Color Institute óziniń Fashion Colour Trend Report Autumn/Winter 2025-2026 atty zertteýinde «Jyl túsi» retinde – Mocha Mousse – jyly, qanyq qońyr tústi tańdady.
Negizgi tús trendteri
1. «Mocha Mousse» – sándegi beıtarap bazalyq reńkterdiń biri. Biryńǵaı monohrom (barlyq kıim bir reńkte) óte sándi. Sonymen birge, Mocha Mousse-ty ashyq tústermen úılestirip kıý de jarasymdy.
2. «Winterberry» tárizdi qyzǵylt tús – sán salasynyń mamandary bul reńkti kúz/qys maýsymyndaǵy mańyzdy aksent dep tanydy. Bul tústi de bastan aıaq kıýge nemese qara, kógildir, sur bazalyq túspen úılestirýge bolady.
3. Brandied Melon / Amber – bul reńk te kúzde erekshe tabıǵı kórinedi. Bul qońyr jáne sút reńkti túspen óte ádemi úılesedi.
4. Fern / Olive Green – bul da tabıǵı tús bolǵandyqtan ásirese, serýenge, qydyrysqa kıetin kıimge erekshelik beredi. Aqshyl nemese qara tústermen jaqsy úılesedi. Sondaı-aq, jasyldy aksesýar arqyly aksent retinde qoldanýǵa bolady.
5. Deep Plum / Damson – sángerler kúlgin tústi de kúzgi trend retinde qabyldady.Velvet, atlas, bylǵary sıaqty materıaldarǵa bul tús erekshe jarasymdy, qara jáne metal elementtermen tolyqtyrýǵa bolady.
Stılıser ne deıdi?
Ylǵı bir tústi kıim kıýge úırengenderge mamandar jańa, sándi reńkterdi birtindep engizýge keńes beredi.
1. Tústerdi bir-eki aksentpen qosyp kórińiz. Eger buryn kúzde qara-aq, qara-qońyr tústi kóbirek qoldanǵan bolsańyz, bıyl Mocha Mousse, záıtún nemese kúlgin reńkti bir aksesýar alyńyz.
2. Tek túske ǵana emes, tekstýraǵa da mán berińiz. Túsiniń ádemiligimen qatar, matanyń sapasy da mańyzdy: mysaly, Mocha Mousse tústi kashemır, velvet, joǵary sapaly bylǵary buıymdar erekshe kórinedi.
3. Monohrom (bir tústi kıim) trendin qoldanyńyz. Tolyqtaı qońyr kostúm nemese syrtqy kıim – kúzdiń sándi sımvoly.
4. Tústerdi úılestirińiz. Mysaly, Mocha Mousse + záıtún jasyl, nemese qyzyl aksent + beıtarap tústi kontrast pen úılesim obrazdy jandandyrady.
5. Terińizdiń reńin eskerińiz. Jyly reńkti teri úshin (qońyr, toqsary, jasyl) jaqsy bolsa, salqyn reńkti terige (baklajan, bordo-kúlgún) usynylady.
6. Kóńil-kúıge saı tús tańdańyz. Pantone anyqtaǵan túster – jaı ǵana sán emes, sonymen birge emosıalyq fon ekenin esten shyǵarmańyz.
Qazir sánge mán beretinderdiń qarasy kóbeıgen. Ár maýsymda kóılek-kónshegin jańalaý úshin stılısiń qyzmetine júginetinder de barshylyq. Qyz-kelinshekterge kıim tańdap, obraz quraýǵa kómektesip júrgen stılıs Gúlden Qýanysh bylaı dedi:
2025 jyldyń kúz-qys mezgilindegi sán baǵyty tabıǵatpen úılesken jyly túster men erkin, jaıly úlgilerge negizdelgen. Maýsymnyń basty túsi – moka reńki, ıaǵnı qoıý qońyr men sútti kofe tústeriniń qosyndysy. Sonymen qatar, kúlgin tús te keńinen qoldanylady. Al kúndelikti kıimde sur, qara-qońyr sekildi beıtarap túster ózektiligin joǵaltpaıdy.
Bul maýsymda jún men barqyttan tigilgen kıimder suranysqa ıe bolady. Sonymen birge, bylǵary buıymdar da sánge oralyp otyr. Kıim úlgilerinde qabattap kıý tásili keń taralady. Sebebi, bul ári jyly, ári stıldi kórinetini sózsiz.
Sońǵy jyldary sán tek kórkemdikke emes, ekologıalyq tazalyq pen uzaq merzimdilikke de nazar aýdara bastady.