Qazaqstannyń «Altyn belgi» túlekteri
2020-2021 oqý jylynyń qorytyndysy boıynsha, 9 738 túlek «Altyn belgi» ıegeri atandy. Bul ótken jyldarmen salystyrǵanda rekordtyq kórsetkish. 2019 jyly tósbelgini 7349 oqýshy, 2020 jyly 8 615 oqýshy ıelengen bolatyn, dep habarlady Almaty-akshamy.kz. QR BǴM saıtyndaǵy habarǵa silteme jasap.
Bıyl «Altyn belgi» ıegeri atanǵan túlekterdiń basym bóligi Túrkistan (1 856), Almaty (1 432) jáne Shyǵys Qazaqstan (738) oblystarynan. Erekshe úlgidegi atestat ıegerleri saltanatty is-shara barysynda marapattaldy.
«9 738 úmitker qorytyndy atestattaý barysynda óz bilimderin dáleldep, «Altyn belgi» ıegeri atandy. Bul túlekterdiń jalpy sanynyń 6,2% quraıdy. Mektep oqýshylarynyń sany jyl saıyn artyp keledi. Osyǵan baılanysty, jaqsy kórsetkishterge jetkenderdiń sany da ósip jatyr. Sonymen qatar taǵy qýantarlyq jáıt — «Altyn belgi» ıegerleriniń kóbi muǵalim mamandyǵyn tańdap jatyr. Bolashaqta dál osyndaı oqýshylarymyz muǵalimderdiń qataryn tolyqtyrsa, nur ústine nur», — dep atap ótti QR BǴM Mektepke deıingi jáne orta bilim komıtetiniń tóraıymy Maıra Meldebekova.
Bıyl «Altyn belgige» úmitkerlerdiń emtıhan jumystaryn mektepter emes, bilim basqarmalary janyndaǵy komısıalar qaraǵanyn aıta ketken jón. Komısıa quramyna bilikti ári tájirıbeli pán muǵalimderi kiredi. Qurylǵan komısıanyń sheshiminen keıin ǵana oqý ozattarynyń tizimi bekitildi. Bul «Altyn belgi» taǵaıyndaý rásiminiń ashyqtyǵyn qamtamasyz etip, sybaılas jemqorlyq táýekelderin joıady.
Jalpy, bıyl qazaqstandyq oqýshylar álemdik zıatkerlik baıqaýlarǵa qatysyp, 67 altyn, 125 kúmis jáne 195 qola medal jeńip aldy. Sonymen birge halyqaralyq arenada óz bilimderin kórsetti. Qazaqstan álemniń 110 eliniń arasynda beıresmı komandalyq esepte úzdik otyzdyqqa kirdi. 1998 jyly Qazaqstan 50-shi orynda bolǵan edi.